रमजान ईद निमित्त कल्याण पश्चिमेतील दुर्गाडी इदगाह येथे सार्वजनिक रस्त्यावर नमाज पठणाचा कार्यक्रम मुस्लिम समाजातर्फे केला जातो. त्यामुळे ३ व ४ मे रोजी ईद निमित्त नमाज पठणाच्यावेळी गोविंदवाडी बाह्यवळण रस्ता, दुर्गामाता चौकाकडे येणाऱ्या वाहतुकीत बदल करण्यात आले आहेत, अशी माहिती पोलीस उपायुक्त बाळासाहेब पाटील यांनी दिली. तसेच, या दोन दिवसात सर्व प्रकारची अवजड वाहने, बहुचाकी वाहनांना कल्याण शहरातून प्रवेश बंद करण्यात येणार आहे.
कल्याण शहरातून शिवाजी चौकातून लाल चौकी दिशेने येऊन भिवंडीकडे जाणाऱ्या सर्व प्रकारच्या वाहनांना लाल चौकी येथे प्रवेश बंद करण्यात येणार आहे. तर पर्यायी रस्ता म्हणून लालचौकी येथे प्रवेश बंद केलेली सर्व प्रकारची वाहने उजवे वळण घेऊन आधारवाडी चौक येथून वाडेघर सर्कल मार्गे इच्छित स्थळी जातील.
तर भिवंडीकडून कल्याण शहरातील आग्रा रस्ता मार्गे गोविंदवाडी बाह्यवळण रस्ता येथून कल्याणमध्ये येणाऱ्या सर्व प्रकारच्या वाहनांना दुर्गामाता चौक येथे प्रवेश बंद करण्यात येणार आहे. ही वाहने दुर्गामात चौक येथे डावे वळण घेऊन वाडेघर सर्कल येथून इच्छित स्थळी जातील.
कल्याण पूर्वेतील कोळसेवाडी भागातून पत्रीपूल मार्गे गोविंदवाडी बाह्य रस्त्याने दुर्गामाता चौकाकडे येणाऱ्या सर्व प्रकारच्या वाहनांना पत्रीपूल येथे प्रवेश बंद करण्यात येणार आहे. तर पत्रीपूल येथे रस्ता बंद केल्याने कल्याण पूर्व, शिळफाटा दिशेकडून येणारी वाहने शिवाजी चौक, लालचौकी येथे उजवे वळण घेऊन आधारवाडी चौक मार्गे इच्छित स्थळी जातील.
अवजड वाहतूक बंद
कल्याण शहरातील दु्गाडी चौक, गोविंदवाडी बाह्यवळण रस्ता, पत्रीपूलमार्गे दुर्गाडी चौक, शिवाजी चौक मार्गे होणाऱ्या कंटेनर, ट्रेलर, बहुचाकी, अवजड वाहनांना रमजान ईदच्या दोन्ही दिवशी शहरात प्रवेश बंद ठेवण्यात येणार आहे. या वाहनांच्या चालकांनी पर्यायी रस्त मार्गे इच्छित स्थळी जावे. रुग्णवाहिका, पोलीस वाहन, अग्निशमन वाहने, इतर अत्यावश्यक सेवेतील वाहनांना हा नियम लागू नाही, असे उपायुक्त पाटील यांनी सांगितले.
