पंतप्रधान नरेंद्र मोदी यांनी खासदार डाॅ. श्रीकांत शिंदे यांचा दुसऱ्यांदा केला ‘भाऊ’ म्हणून उल्लेख

महाराष्ट्राचे विद्यमान राज्यपाल सी. पी. राधाकृष्णन यांना राष्ट्रीय लोकशाही आघाडीतर्फे उपराष्ट्रपती पदासाठी उमेदवारी जाहीर करण्यात आली.

MP Dr Shrikant Shinde, MP Prataprao Jadhav honoring Governor C P Radhakrishnan

(राज्यपाल सी. पी. राधाकृष्णन यांचा सन्मान करताना खासदार डाॅ. श्रीकांत शिंदे, खासदार प्रतापराव जाधव.) (लोकसत्ता टिम)

कल्याण – कल्याण लोकसभा मतदारसंघात शासनाकडून कोट्यवधीचा निधी आणून मतदारसंघातील विविध विकास कामे मार्गी लावण्यात पुढाकार घेणारे, आपल्या लोकसभा मतदारसंघात विकासपुरूष म्हणून ओळखल्या जाणाऱ्या खासदार डाॅ. श्रीकांत शिंदे यांचा पंतप्रधान नरेंद्र मोदी यांनी दुसऱ्यांदा भाऊ म्हणून उल्लेख केल्याने लोकसभा खासदारांमध्ये हा चर्चेचा विषय झाला आहे.

महाराष्ट्राचे विद्यमान राज्यपाल सी. पी. राधाकृष्णन यांना राष्ट्रीय लोकशाही आघाडीतर्फे उपराष्ट्रपती पदासाठी उमेदवारी जाहीर करण्यात आली. या पार्श्वभूमीवर मंगळवारी दिल्ली येथील जीएमसी बालयोगी सभागृहात पंतप्रधान नरेंद्र मोदी यांच्या मुख्य उपस्थितीत राष्ट्रीय लोकशाही आघाडीची बैठक पार पडली. यावेळी राज्यपाल सी. पी. राधाकृष्णन यांना खासदार डॉ. श्रीकांत एकनाथ शिंदे यांनी शिवसेनेच्यावतीने शुभेच्छा देत सत्कार केला. खासदार डॉ. शिंदे राज्यपाल सी. पी. राधाकृष्णृन यांच्या दिशेने जात असताना पंतप्रधान नरेंद्र मोदी यांनी पुन्हा एकदा काय भाऊ म्हणून खासदार शिंदे यांच्याकडे पाहून हाक मारली. यानंतर खासदार डॉ. शिंदे यांनी पंतप्रधान नरेंद्र मोदींचे आभार व्यक्त केले. उपस्थितांमध्ये पंतप्रधानांच्या भाऊ हाकेची चर्चा बराच वेळ रंगली होती.

राज्यपाल सी. पी. राधाकृष्णन यांची राष्ट्रीय लोकशाही आघाडीतर्फे उपराष्ट्रपती पदासाठी उमेदवारी जाहीर करण्यात आली आहे. या पार्श्वभूमीवर उपमुख्यमंत्री एकनाथ शिंदे यांच्या मार्गदर्शनाखाली एनडीएतील घटक पक्ष म्हणून शिवसेनेने राधाकृष्णन यांना पाठिंबा दिला आहे. दिल्ली येथे एनडीएच्या विविध बैठकांचे सत्र सुरु आहे. मंगळवारी सकाळी दिल्ली येथील जीएमसी बालयोगी सभागृहात देशाचे पंतप्रधान नरेंद्र मोदी यांच्या मुख्य उपस्थितीत एनडीएची बैठक पार पडली. यावेळी विविध पक्षांकडून सी. पी. राधाकृष्णन यांचा जाहीर सत्कार करण्यात आला. यावेळी शिवसेनेच्या वतीने खासदार डॉ.श्रीकांत शिंदे आणि मंत्री प्रतापराव जाधव यांनी शिवसेनेच्या वतीने त्यांचा सत्कार केला. खासदार डॉ. शिंदे सत्कारासाठी उभे राहताच पंतप्रधान नरेंद्र मोदी यांनी त्यांना ” काय भाऊ ” म्हणून हाक मारली.

ऑपरेशन सिंदूरची माहिती विविध देशांमध्ये देण्यासाठी गेलेल्या एका शिष्टमंडळाचे खासदार डॉ. श्रीकांत शिंदे यांनी नेतृत्व केले होते. यावेळी त्यांना शिष्टमंडळातील इतर सहकारी खासदारांकडून डाॅ. शिंदे यांना भाऊ म्हणून संबोधित केले जायचे. महाराष्ट्रात आपल्या दूरवरच्या परिचयातील व्यक्तिला भाऊ म्हणून संबोधले जाते. त्या व्यक्तिविषयी एक प्रेम आदरभाव या शब्दातून व्यक्त केला जातो. राज्याच्या संस्कृतीचा विचार करून पंतप्रधान नरेंद्र मोदी यांनी हाच शब्द पकडून दुसऱ्यांदा खासदार डाॅ. शिंदे यांचा भाऊ म्हणून उल्लेख केला आहे. यापूर्वी सर्व शिष्टमंडळाच्या बैठकीत पंतप्रधान नरेंद्र मोदी यांनी खासदार डॉ. श्रीकांत शिंदे यांना भाऊ म्हणून संबोधले होते. यानंतर आज पुन्हा एकदा पंतप्रधानांकडून खासदार डॉ. श्रीकांत शिंदे यांना भाऊ म्हणून संबोधल्याने संपूर्ण संसदेत हा चर्चेचा विषय होता.