खासगी सीएनजी पंप मालक ४ जानेवारीपासून संपावर

ठाण्यात मंगळवारी युनायटेड सीएनजी डीलर असोसिएशनची बैठक आयोजित करण्यात आली होती. मुंबई, ठाणे आणि रायगड जिल्ह्य़ात सुमारे ४० खासगी सीएनजी पंप आहेत. मात्र, महानगर गॅस कंपनीने आता नवे धोरण आणले आहे. या धोरणानुसार सीएनजीच्या खासगी पंप मालकांना महानगर गॅस कंपनीसोबत १५ वर्षे भाडेकरार करावा लागणार आहे. तसेच या नव्या धोरणात पंप परिसरातील स्वच्छतागृहे अस्वच्छ असल्यास थेट करार रद्द करण्यासारख्या अनेक जाचक अटी आहेत. त्यामुळे या नव्या धोरणांविरोधात खासगी सीएनजी पंप मालकांनी संप करण्याचा निर्णय घेतला आहे. या मागण्या मान्य न झाल्यास पेट्रोल डीलर संघटनाही आमच्या मागण्यांच्या समर्थनासाठी त्यांच्या पंपावरील सीएनजी पंप बंद ठेवणार असल्याचे युनायटेड सीएनजी डीलर असोसिएशन समितीचे सदस्य संजय कदम यांनी सांगितले.