नाशिक महापालिकेचे आयुक्त कैलाश जाधव यांच्या ठाण्यातील निवासस्थानातून १ लाख ६२ हजार रुपयांची रोकड चोरीला गेल्याचा प्रकार उघडकीस आला आहे. याप्रकरणी कैलाश जाधव यांच्या मुलाने दिलेल्या तक्रारीच्या आधारे चितळसर पोलीस ठाण्यात गुन्हा दाखल करण्यात आला असून पोलीस आरोपीचा शोध घेत आहेत. नाशिक महापालिकेचे आयुक्त कैलाश जाधव यांचे ठाण्यातील वसंत विहार येथे बंगला आहे. या बंगल्यात त्यांच्या पत्नी आणि मुलगा राहतात. शुक्रवारी सांयकाळी दोघेही जण नाशिक येथे कैलाश जाधव यांना भेटण्यासाठी गेले होते. घरात कोणीही नसताना चोरट्यांनी बंगल्यातील १ लाख ६२ हजार रुपयांची रोकड चोरी केली. दुसऱ्या दिवशी घरातील नोकराने घर उघडून पाहिल्यानंतर हा प्रकार उघडकीस आला. याप्रकरणी चितळसर पोलीस ठाण्यात गुन्हा दाखल करण्यात आला आहे.