ठाणे : शहाड येथील जल उदंचन केंद्रावर दुरुस्तीची कामे हाती घेण्यात येणार आहे. त्यामुळे या कामांसाठी मंगळवारी ठाणे महापालिका क्षेत्रातील पाणी पुरवठा २४ तास बंद राहणार आहे. महापालिकेच्या स्वतःच्या पाणी पुरवठा योजनेचे नियोजन करुन टप्या टप्प्याने ठाणे शहरात एक वेळ पाणी पुरवठा सुरु ठेवण्याचे नियोजन असल्याचे महापालिकेने स्पष्ट केले.
शहाड येथील उदंचन केंद्रावर मीटर बदलण्याचे काम आणि जलवाहिनीची गळती बंद करण्याची कामे महावितरण कंपनीकडून केली जाणार आहे. त्याअनुषंगाने घोडबंदर रोड, पातलीपाडा, बाळकुम, ब्रम्हांड, पवारनगर, कोठारी कंपाऊंड, डोंगरीपाडा, वाघबीळ या ठिकाणाचा पाणी पुरवठा मंगळवारी सकाळी ९ ते रात्री ९ वाजेपर्यंत बंद राहील. तर समतानगर, ऋतुपार्क, सिध्देश्वर, इंटरनिटी, जॉन्सन, कारागृह परिसर, साकेत, उथळसर, रेतीबंदर, कळव्याच्या व मुंब्रा येथील काही भागात मंगळवारी रात्री ९ ते बुधवारी सकाळी ९ वाजेपर्यंत बंद राहील.
महापालिकेने टप्या-टप्प्याने एक वेळ पाणी पुरवठा सुरु ठेवण्याचे नियोजन केले. तसेच पाणी पुरवठा पूर्व पदावर येईपर्यंत पुढील एक ते दोन दिवस कमी दाबाने पाणी पुरवठा होण्याची शक्यता असल्याचे महापालिकेने स्पष्ट केले.
