सुरेंद्र वाजपेयी क्रीडागृहात पाटर्य़ाना ऊत

टाकाऊ वस्तूंचे भांडार
वाजपेयी बंदिस्त क्रीडागृहात नेहमीच महापालिकेतील टाकाऊ वस्तू आणून ठेवल्या जातात. महापालिका निवडणुकीपूर्वी विशेष राखीव दलाचे जवान येथे राहत होते. दीड महिने त्यांचा या ठिकाणी मुक्काम होता. आता पालिका निवडणुकीसाठी वापरलेल्या मतदान यंत्रांच्या रिकाम्या पेटय़ा सभागृहात ठेवण्यात आल्या आहेत. त्यामुळे बॅडमिंटन खेळता येत नाही. रात्रीच्या वेळेत सभागृहात मोठय़ा प्रमाणावर मद्यपाटर्य़ा होतात तसेच सकाळी येणाऱ्या रहिवाशांना या बाटल्या उचलाव्या लागतात, अशी तक्रार संदीप चांदसकर, सुनील शहा, प्रकाश कुंदर, स. गि. सरदेसाई, किशोर बोलर, व्ही. एन. जीन्मया यांनी एका निवेदनाद्वारे आयुक्तांकडे केली आहे.

पालिकेच्या दुर्लक्षामुळे दुरवस्था
बंदिस्त क्रीडागृह सामाजिक, क्रीडाप्रेमी संस्थांना चालविण्यास दिले तर महापालिकेला महसूलाचा स्रोत सुरू होईल, असे या नागरिकांनी पालिकेला सुचविले आहे. क्रीडागृहातील विजेची व्यवस्था नादुरुस्त आहे. वीज वाहिन्या तुटल्या आहेत. काठी घेऊन पंखे, वीज सुरू करावी लागते. क्रीडाप्रेमी नागरिकांनी एकत्र येऊन या ठिकाणी विजेची व्यवस्था सुस्थितीत करून घेतली आहे. या ठिकाणचे स्वच्छतागृह स्वच्छ नसते. तेही क्रीडाप्रेमी नागरिक एकत्र येऊन स्वच्छ करतात. महापालिका प्रशासनाने बंदिस्त क्रीडागृह सामान्यांसाठी मोकळे राहील आणि रात्रीच्या वेळेत तेथील गैरप्रकार थांबिवण्याच्या दृष्टीने प्रयत्न करावेत, अशी मागणी क्रीडा प्रेमींकडून केली जात आहे. क्रीडासंकुलाच्या विकासासाठी सामान्य नागरिक मदतीचा हात पुढे करतील, असा विश्वास चांदसकर आणि त्यांच्या सहकाऱ्यांनी प्रशासनाला दिला आहे.