डोंबिवली: शिवसेनेच्या नेत्या सुषमा अंधारे यांच्या वक्तव्याच्या निषेधार्थ शनिवारी हिंदुत्ववादी संघटना, बजरंग दल, बाळासाहेबांची शिवसेना पक्षाने डोंबिवली-कल्याण बंदचे आवाहन केले आहे. आज सकाळपासूनच डोंबिवली कल्याण शहरातील व्यवहार नियमितपणे सुरू झाले आहेत. रिक्षा बस वाहतूक सुरळीत सुरू आहे. बाजारपेठा नेहमीप्रमाणे उघडण्यात आल्या आहेत. डोंबिवलीतील लालबावटा रिक्षा संघटनेने आम्ही या बंदमध्ये सामील होणार नाही असे जाहीर केले आहे. तर ज्यांना या बंदमध्ये सामील व्हायचे आहे त्यांनीच सामील व्हावे. कोणावर सक्ती केली जाणार नाही असे बाळासाहेबांची शिवसेना पक्षातर्फे जाहीर करण्यात आले. त्यामुळे हा बंद किती यशस्वी होतो अशी चर्चा आता सुरू झाली आहे.
