ठाण्याच्या सेंट्रल मैदानातील स्पोर्टिंग क्लब बांधकामावर पालिकेचा हातोडा, पूर्वसूचननेविना आकसबुद्धीने कारवाई केल्याचा स्पोर्टिंग क्लब कमिटीच्या पदाधिकाऱ्यांचा आरोप

ठाणे येथील सेंट्रल मैदानाचे व्यवस्थापन स्पोर्टिंग क्लब पाहत असून या संस्थेला १०१ वर्ष पूर्ण झाले आहेत. या संस्थेमार्फत मैदानात क्रिकेट प्रशिक्षण दिले जाते. या संस्थेने मैदानात बांधकाम केले होते. हे बांधकाम बेकायदा असल्याच्या तक्रारी पालिकेकडे प्राप्त झाल्या होत्या. या बांधकामावर पालिकेने सोमवारी कारवाई केली. यावरून स्पोर्टिंग क्लब कमिटीच्या पदाधिकाऱ्यांनी पत्रकार परिषद घेऊन संताप व्यक्त करत पालिकेला प्रश्न विचारले आहेत. यावेळी स्पोर्टिंग क्लब कमिटीचे उपाध्यक्ष किशोर ओवळेकर, कार्यकारिणी सदस्या सुषमा मढवी, सदस्य ऍड अमीर शेख, संदीप पाचंगे उपस्थित होते.

ठाणे महापालिकेच्या अतिक्रमण विभागाने खेळाडूंच्या सोयीसाठी बांधण्यात आलेली चेंजिग रूम, इनडोअर खेळपट्टी तोडून टाकली. वास्तवीक पाहता अनधिकृत बांधकामे तोडताना दोन दिवसांची नोटीस दिली जाते. पण कोणत्याही नोटीसविना ही तोडक कारवाई केल्याचा आरोप स्पोर्टिंगचे सचिव दिलीप धुमाळ यांनी केला. स्पोर्टिंगने बांधलेल्या चेंजिग रूम आणि इतर गोष्टींसाठी महापालिकेने १२ सप्टेंबर २०२२ रोजी नोटीस पाठवली होती. पण, त्यानंतर त्यांनी कसलीही कारवाई केली नाही. पण एका न्यायालयीन प्रकरणात १७ जून रोजी अंतिम सुनावणी आणि निकाल अपेक्षित असल्याचे सांगून एक दिवस कारवाई पुढे ढकलण्याची विनंती करून सुध्दा हे बांधकाम १६ जून रोजी तोडण्यात आले, असे धुमाळ म्हणाले.

उच्च न्यायालयात दाखल करण्यात आलेल्या एका जनहित याचिकेवर ९ जून रोजी झालेल्या सुनावणी दरम्यान १७ जून रोजी अंतिम सुनावणी घेण्याचे निर्देश देण्यात आले होते. त्यामुळे या प्रकरणात उच्च न्यायालयाचा निकाल येईपर्यंत थांबावे, अशी विनंती स्पोर्टिंगच्या पदाधिकऱ्यांनी केली. आज या प्रकरणात उच्च न्यायालयाने स्पोर्टिंग क्लब कमिटीच्या बाजूने निकाल दिला असल्याचे धुमाळ यांनी सांगितले. केवळ न्यायालयीन प्रकरणात निकाल आपल्या विरोधात जाणार असल्याचा अंदाज आल्याने केवळ त्रास देण्यासाठी ही कारवाई केल्याचा आरोप स्पोर्टिंगच्या पदाधिकाऱ्यांनी केला.