ठाणे : सामान्य नागरिकांना सरकारी सेवा त्यांच्या दारात सहज, सुलभ आणि जलदगतीने उपलब्ध व्हाव्यात, यासाठी ठाणे जिल्हा परिषदेने काही महिन्यांपूर्वी ‘डोअर स्टेप डिलिव्हरी’(Door Step Delivery) हा अभिनव उपक्रम सुरु केला. या उपक्रमाला ग्रामीण भागातील नागरिकांचा उत्तम प्रतिसाद मिळत असून आतापर्यंत साडेतीन हजाराहून अधिक नागरिकांना घरपोच दाखले देण्यात जिल्हापरिषदेला यश आले आहे.
‘डोअर स्टेप डिलिव्हरी’(Door Step Delivery) या उपक्रमाच्या माध्यमातून जिल्ह्यातील ४३१ ग्रामपंचायतींमध्ये नागरिकांना घरबसल्या शासनाच्या विविध सेवा मिळत आहेत. जिल्हा परिषदेचे मुख्य कार्यकारी अधिकारी रोहन घुगे यांच्या मार्गदर्शनाखाली हा उपक्रम लोकाभिमुख आणि परिणामकारक ठरत आहे. सर्वसामान्य नागरिकांना त्यांच्या दारी सेवा उपलब्ध करून देणे, हेच खऱ्या अर्थाने सुशासनाचे प्रतीक आहे. या उपक्रमाद्वारे आम्ही प्रशासन आणि जनतेतील अंतर कमी करत आहोत. हा उपक्रम प्रत्येक गावात, प्रत्येक घरापर्यंत पोहोचवण्याचा जिल्हा परिषदेचा संकल्प आहे.
या प्रणालीद्वारे नागरिकांना घरबसल्या ४०२ प्रकारच्या शासकीय सेवा मिळत आहेत. प्रायोगिक तत्त्वावर सुरू झालेल्या या उपक्रमाला नागरिकांचा चांगला प्रतिसाद मिळत आहे. आतापर्यंत ४ हजार १३ अर्ज प्राप्त झाले असून त्यापैकी ३ हजार ६५९ नागरिकांना घरपोच सेवा देण्यात आली आहे. उर्वरित १७० अर्जांवर काम सुरू असल्याबाबतची माहिती जिल्हा परिषदेचे उपमुख्य कार्यकारी अधिकारी (ग्रामपंचायत) प्रमोद काळे यांनी दिली.
या सेवा घरपोच दिल्या जातात.
- लोकहक्क सेवा आयोगांतर्गत येणारा मृत्यू दाखला, जन्म दाखला, दारिद्र्यरेषेखालील दाखला, ग्रामपंचायतीचा येणे बाकी नसल्याचा दाखला, विवाह नोंदणी दाखला, नमुना क्रमांक ८ चा दाखला (मालमत्ता फेरफार), निराधार योजनेसाठी वयाचा दाखला असे सात दाखले प्राधान्याने ‘डोअर स्टेप डिलिव्हरी’(Door Step Delivery) मार्फत घरपोच दिले जात आहेत.
- त्यासह जातीचा दाखला, अधिवास प्रमाणपत्र, नॉन-क्रिमिलेयर प्रमाणपत्र, उद्योग आधार, जीवन प्रमाणपत्र, शिष्यवृत्ती अर्ज, पॅनकार्ड व दुरुस्ती, पासपोर्टसाठी शपथपत्र, अधिवास प्रमाणपत्र, जात वैधता प्रमाणपत्र, शेत मोजणी अर्ज, चारित्र्य पडताळणी प्रमाणपत्र, राजपत्र प्रकाशन, १५ वर्षाचे रहवासी प्रमाणपत्र, खाद्य परवाना जीवन प्रमाणपत्र, हयात प्रमाणपत्र, आयुष्यमान भारत कार्ड, शेत मोजणी अर्ज, डिश टीव्ही डिटीएच रीचार्ज, शिष्यवृत्ती अर्ज, केंद्र सरकार ओबीसी प्रमाणपत्र, वारसा प्रमाणपत्र, जीएसटी अर्ज, हॉटेल परवाना, टीकीट आरक्षण, निवासी शाळा, परदेशी शिष्यवृति, शासकीय वसतिगृह प्रवेश, अर्थ कुटुंब सहाय्य, नविन कौटुंबिक शिधापत्रिका, महाभरती, रोजगार व स्वयंरोजगार संचालनालय अंतर्गत येणाऱ्या नोंदणी, भूमिहीन असल्याचे प्रमाणपत्रासाठी अर्ज.
- महसूल विभाग, पोलीस/गृह विभाग, भूमि अभिलेख विभाग, अन्न व नागरी पुरवठा विभाग, समाज कल्याण व सामाजिक न्याय विभाग, शासन मुद्रण, लेखनसामग्री व प्रकाशन संचालनालय, शासन मुद्रण, लेखनसामग्री व प्रकाशन संचालनालय, अन्न सुरक्षा आणि मानक प्राधिकरण, डिजिटल जीवन प्रमाण, आयकर विभाग, पासपोर्ट-परराष्ट्र व्यवहार मंत्रालय, आरोग्य विभाग, सूक्ष्म, लघु आणि मध्यम उद्यम मंत्रालय, जिल्हा परिषद अशा प्रशासकीय ८० विभागातील सेवा देखील या ‘डोअर स्टेप डिलिव्हरी’(Door Step Delivery) मार्फत घरपोच मिळू शकतात.
ग्रामपंचायतीच्या केंद्रचालकांवर जबाबदारी
ग्रामपंचायतींच्या कार्यरत केंद्रचालक यांना ही जबाबदारी दिली असून यासाठी आपले सरकार सेवा केंद्र मधील केंद्रचालक यांच्यामार्फत कार्यान्वित आहेत. केंद्रचालक नागरिकांकडून वेळ ठरवून त्यांच्या घरी येतात, आवश्यक कागदपत्र स्कॅन करतात आणि ऑनलाइन सेवा प्रक्रिया पूर्ण करतात. सेवा मंजूर झाल्यावर संबंधित प्रमाणपत्र पुन्हा घरपोच पोचवले जाते.
या संकेतस्थळांवर करता येईल नोंदणी
नागरिकांना या सेवेचा लाभ घ्यायचा असेल तर त्यांनी https://thanedoorstep.in/ या संकेतस्थळावरून अपॉईंटमेंट घ्यावी किंवा मदतीसाठी ८३८०८२२३३३ या हेल्पलाईन क्रमांकावर संपर्क साधावा. “नागरिकांनी आपल्या सोयीसाठी या अभिनव उपक्रमाचा लाभ घ्यावा, घरच्या घरी प्रमाणपत्रे आणि शासकीय सेवा मिळवून वेळ आणि प्रवास खर्चाची बचत करावी,” असे आवाहन ठाणे जिल्हा परिषदेच्या वतीने करण्यात आले आहे.
या ‘डोअर स्टेप डिलिव्हरी’(Door Step Delivery) प्रणालीमुळे नागरिकांचा प्रवास खर्च आणि वेळेची बचत होणार आहे. त्यामुळे ठाणे जिल्ह्यातील जास्तीत जास्त नागरिकांनी जलद आणि सुलभ पद्धतीने प्रशासकीय दाखले घरपोच घेण्यासाठी या प्रणालीचा उपयोग केला पाहिजे. – रोहन घुगे, मुख्य कार्यकारी अधिकारी, जिल्हा परिषद ठाणे.
