ठाणे : हवामान खात्याने ठाणे जिल्ह्याला आज अतिवृष्टीचा इशारा दिला असून, यामुळे जिल्हा प्रशासनाने आपत्ती व्यवस्थापन यंत्रणा पूर्णपणे सतर्क ठेवली आहे. पावसाच्या पार्श्वभूमीवर नागरिकांना अनावश्यक घराबाहेर न पडता सुरक्षित राहण्याचे आणि स्वतःची काळजी घेण्याचे आवाहन जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष डॉ. श्रीकृष्ण पांचाळ यांनी केले आहे.
खाडी, नाले व नदीकाठच्या भागातील नागरिकांनी विशेष दक्षता घ्यावी, असेही प्रशासनाने स्पष्ट केले आहे. कोणत्याही प्रकारच्या मदतीसाठी नागरिकांनी ठाणे जिल्हाधिकारी कार्यालयातील जिल्हा आपत्ती व्यवस्थापन नियंत्रण कक्षाशी ०२२-२५३०१७४०, ९३७२३३८८२७ किंवा १०७७ या टोल फ्री क्रमांकावर संपर्क साधावा.
ठाणे जिल्ह्यात मागील दोन दिवसांपासून मोठ्या प्रमाणात पाऊस कोसळत आहे. यामुळे अनेक ठिकाणी पाणी देखील साठले असून नागरिकांना त्रासाला सामोरे लागत आहे. याच पार्श्वभूमीवर आपत्ती अधिनियमाच्या तरतुदींनुसार आणि खबरदारीचा उपाय म्हणून आज ठाणे जिल्ह्यातील सर्व शाळा व महाविद्यालयांना सुट्टी जाहीर करण्यात आली आहे. तसेच शासकीय व निमशासकीय कार्यालयांमध्ये अत्यावश्यक सेवांतील कर्मचाऱ्यांव्यतिरिक्त इतर कर्मचाऱ्यांना सुट्टी देण्याबाबत निर्णय कार्यालय प्रमुखांनी त्यांच्या स्तरावर घ्यावा, अशा सूचना प्रशासनाकडून देण्यात आल्या आहेत. दरम्यान, उद्या २० ऑगस्ट रोजी शाळा व महाविद्यालयांना सुट्टीबाबतचा निर्णय पावसाच्या पुढील अंदाजानुसार आज संध्याकाळपर्यंत जाहीर करण्यात येणार असल्याचे जिल्हा प्रशासनाने स्पष्ट केले आहे
