ठाणे : गेल्या अनेक वर्षांपासून पदोन्नतीच्या प्रतिक्षेत असलेल्या ठाणे महापालिकेच्या आस्थापनेवरील कर्मचाऱ्यांना १५ दिवसांपुर्वी पदोन्नती दिली. यामुळे कर्मचाऱ्यांमध्ये आनंदाचे वातावरण होते. मात्र, त्यापैकी ५४ कार्यालयीन उप अधिक्षक आणि ४९ लिपीकांना अद्यापही बढतीच्या पदाचा कार्यभार देण्यात आलेला नाही. त्यामुळे जुन्याच पदाचा कार्यभार त्यांना सांभाळावा लागत असल्याने त्यांच्या आनंदावर काहीसे विरजण पडले आहे.
ठाणे महापालिकेच्या आस्थापनेवरील अनेक अधिकारी आणि कर्मचारी सेवानिवृत्त होण्याचे प्रमाण गेल्या काही वर्षात वाढले आहेत. यामुळे ठाणे महापालिकेत अनेक पदे रिक्त आहेत. त्याचबरोबर अनेक अधिकारी आणि कर्मचाऱ्यांना पदोन्नती मिळालेली नव्हती. पदोन्नती केव्हा मिळेल, याची पालिका अधिकारी आणि कर्मचारी वाट पाहात होते.
असे असतानाच ठाणे महापालिकेतील शिक्षक आणि कर्मचारी यांच्या पदोन्नतीबाबत निर्णय घेण्यासंदर्भात उपमुख्यमंत्री एकनाथ शिंदे यांनी निर्देश दिले होते. तसेच काही पदोन्नत्तींबाबत शासनाकडून सुस्पष्ट आदेश प्राप्त झाले. त्यामुळे, महापालिका आयुक्त सौरभ राव यांनी अधिकारी, कर्मचारी, शिक्षक यांच्या पदोन्नत्ती करण्यासाठी विशेष मोहीम हाती घेण्याचे निर्देश आस्थापना विभागाला दिले होते. त्यानुसार, ठाणे महानगरपालिकेच्या सेवेतील ३८ उपशिक्षकांना (प्राथमिक विभाग, मराठी माध्यम) मुख्याध्यापक पदावर पदोन्नती देण्यात आली होती.
तर, ५४ वरिष्ठ लिपिकांना कार्यालयीन उपअधिक्षक पदावर पदोन्नती देण्यात आली आहे. तसेच ४९ कर्मचाऱ्यांना लिपीक पदावर पदोन्नती देण्यात आली होती. त्यापाठोपाठ अग्निशमन प्रणेता (लिडिंग फायरमन) या पदावर १९ जणांना, तर सहायक अग्निशमन केंद्र अधिकारी या पदावर २ जणांना पदोन्नती देण्यात आली होती. एकूण १५८ जणांना पदोन्नती देण्यात आली होती. पदोन्नतीच्या या निर्णयांमुळे महापालिका कर्मचारी, शिक्षक यांच्यात आनंदाचे वातावरण होते. त्यांनी उपमुख्यमंत्री एकनाथ शिंदे आणि महापालिका आयुक्त सौरभ राव यांचे आभार मानले होते. या अधिकारी आणि कर्मचाऱ्यांची पदस्थापना लवकरच होणार, असल्याचे महापालिका प्रशासनाने स्पष्ट केले होते.
मात्र, वरिष्ठ लिपीक आणि उप कार्यालयीन अधिक्षक यांना पदोन्नती मिळून १५ दिवसांचा कालावधी लोटला तरी त्यांना पदाचा कार्यभार अद्याप देण्यात आलेला नाही. ज्या पदावर पदोन्नती करण्यात आली आहे. त्या जागा रिक्त नसल्यामुळे त्यांना कार्यभार देण्यात आलेला नसल्याचे पालिका सुत्रांनी सांगितले.
कोणत्या विभागात जागा शिल्लक आहेत, त्याची माहिती घेऊन त्या जागेवर पदोन्नती झालेल्या अधिकाऱ्यांची नेमणुक करण्यात येईल. येत्या आठवडाभरात ही प्रक्रिया पूर्ण केली जाईल. – गजानन गोदेपुरे, उपायुक्त, आस्थापना, ठाणे महापालिका.
