ठाणे : पूर्व द्रुतगती महामार्गावर शुक्रवारी पहाटे डम्परचे चाक पंक्चर झाल्याने मागून आलेल्या एका ट्रकची या डम्परला धडक बसली. त्यानंतर या ट्रकला एका दुचाकीस्वाराची धडक बसली. या अपघातात दुचाकीस्वार वैभव डावखर (२७) याचा मृत्यू झाला. तर ट्रकमधील दोघे जखमी झाले आहेत. या अपघातामुळे हळहळ व्यक्त केली जात आहे.
पूर्व द्रुतगती महामार्गावरुन पहाटे ३ वाजताच्या सुमारास भिवंडीच्या दिशेने डम्परची वाहतुक सुरू होती. डम्पर गोल्डन डाइज येथील उड्डाणपूलाजवळ आला असता, डम्परचे चाक पंक्चर झाले. त्यामुळे डम्पर चालकाने भर रस्त्यात डम्पर उभा केला होता. त्याचवेळी मागून येणाऱ्या ट्रकची या डम्परला धडक बसली. या ट्रक मागून दुचाकी चालक वैभव डावखर हा बाळकुम येथील त्याच्या घरी जात होता.
हेही वाचा…ठाणे शहरातील रिक्षा चालकांचा संपाचा इशारा, दंड स्वरुपात आकारण्यात येणारी रक्कम कमी करण्याची मागणी
या अपघातग्रस्त ट्रकला त्याच्या दुचाकीची धडक बसली. अपघातात वैभव डावखर गंभीर जखमी झाला. तसेच डम्परला धडक बसल्याने ट्रकच्या पुढील भागाचा चुराडा झाला. या ट्रकमधील चालक धर्मेंद्र यादव आणि त्याचे सहकारी सुनील बाकरे हे देखील जखमी झाले. वैभव याला येथील एका खासगी रुग्णालयात नेण्यात आले. परंतु रुग्णालयात दाखल करण्यापूर्वीच त्याचा मृत्यू झाला होता. तर, धर्मेंद्र आणि सुनील यांच्यावर जिल्हा शासकीय रुग्णालयात उपचार सुरू आहेत.
