डोंबिवली ते ठाकुर्ली रेल्वे स्थानकांच्या दरम्यान दोन वेगळ्या घटना दोन प्रवाशांचा लोकलमधून पडून मृत्यू झाला. एका प्रवाशाची ओळख पोलिसांना पटली आहे. दुसऱ्या प्रवाशाची ओळख अद्याप पटलेली नाही. त्याच्या नातेवाईकांचा शोध डोंबिवली लोहमार्ग पोलीस घेत आहेत.
कल्याणकडून सीएसएमटीकडे चाललेल्या लोकलला एक प्रवासी दरवाजाजवळ लोंबकळून प्रवास करत होता. हा प्रवासी प्रवास करताना रूळा लगतच्या खांबाना हात लावत होता, असे सहप्रवाशांनी सांगितले. ठाकुर्ली जवळ एका खांबाचा जोरदार फटका हाताला बसताच लोंबकळत असलेला प्रवासी लोकलमधून खाली पडला. त्याचा जागीच मृत्यू झाला. लोहमार्ग पोलिसांना एका महिला प्रवाशाने ही माहिती दिली. पोलिसांनी त्याचा मृतदेह ताब्यात घेतला. त्याची ओळख पटलेली नाही.
दुसऱ्या घटनेत ठाकुर्ली रेल्वे स्थानकाजवळ मुंबई दिशेने जाणाऱ्या लोकलमधून पडून मनोज शंकर म्हात्रे (४०) या प्रवाशाचा मृत्यू झाला. मनोज यांचा मृतदेह त्याच्या कुटुंबीयांच्या ताब्यात देण्यात आला. डोंबिवली लोहमार्ग पोलीस ठाण्यात या दोन्ही अपघातांची नोंद करण्यात आली आहे.
