अखेर जलपर्णी यंत्रे पोहोचली, हटवण्याचे काम सुरू

उल्हास नदीतील या जलपर्णी हटवण्यासाठी सामाजिक संघटना आणि पर्यावरण प्रेमींनी आंदोलन केले होते. याची दखल घेत राज्याचे अप्पर मुख्य सचिव असीम गुप्ता यांनी एमएमआरडीए मुख्यालयात विशेष बैठक बोलावत जलपर्णीवर तोडगा काढण्यासाठी प्रयत्न सुरू केले. २८ मार्च रोजी झालेल्या या बैठकीत जलपर्णी काढण्यासाठी पंधरा दिवसात यंत्र उपलब्ध करून दिले जाईल आणि या यंत्रांची संख्या १० पर्यंत वाढवली जाईल असे ठरवण्यात आले होते. मात्र ही यंत्रे पंधरा दिवसात उपलब्ध होऊ शकली नाहीत. अखेर शुक्रवारी उल्हास नदीपात्रात हे यंत्र उतरवण्यात आले. या यंत्राच्या मदतीने जलपर्णी काढण्यास सुरुवात करण्यात आली.

जलपर्णीपासून मिळणार रोजगार

उल्हास नदीतून काढला जाणाऱ्या जलपर्णीला सुकवून त्यापासून विविध गृहपयोगी वस्तू तयार केल्या जाणार आहेत. यासाठी जिल्हा परिषद महिला बचत गटांना प्रशिक्षण देत आहे. जलपर्णीचा कचरा फेकला जाणार नाही तर त्यापासून पुनर्निर्मिती केली जाणार आहे. यातून महिलांना रोजगार उपलब्ध होणार असून त्यांना चांगला मोबदलाही मिळणार आहे.

कृती आराखडाही वेळेत तयार करा

उल्हास नदीतील जलपर्णी काढण्याची तयारी महाराष्ट्र प्रदूषण नियंत्रण मंडळाने केली आहे. यासोबतच दीर्घकालीन परिणाम करणारी उपाययोजना राबवावी अशी पर्यावरण प्रेमींची मागणी आहे. यासाठी सर्व शासकीय यंत्रणांनी एकत्र येऊन कृती आराखडा तयार करावा असे आदेश असीम गुप्ता यांनी दिले होते. त्यामुळे जलपर्णी काढण्यात सोबतच हा कृती आराखडा ही वेळेत पूर्ण करावा आणि त्याची अंमलबजावणी तात्काळ करावी अशी पर्यावरण प्रेमींची मागणी आहे.