कल्याण पालिका निवडणुकीचे मतदान ३० ऑक्टोबरला?

संपूर्ण ठाणे जिल्ह्याचे लक्ष लागून असलेल्या कल्याण-डोंबिवली महापालिकेचा निवडणूक कृती आराखडा तयार करण्यात आला आहे. या आराखडय़ानुसार २५ जूनला प्रभाग आरक्षणाची सोडत होणार आहे. ३० ऑक्टोबरला महापालिकेच्या निवडणुका होण्याची शक्यता व्यक्त करण्यात आली आहे.
महापालिकेचा निवडणूक कृती आराखडा हा पाच टप्प्यांत तयार करण्यात आला आहे. एक जूनपासून ते ३० नोव्हेंबपर्यंत हा आराखडा आखण्यात आला आहे. यंदा प्रभाग रचनेचे नकाशे हे ऑटोकॅ ड किंवा अन्य डिजिटल स्वरुपात तयार करण्यात येणार आहेत. निवडणूक आयोगाने मान्यता दिल्यानंतर प्रभाग रचना ही गुगल मॅपच्या इमेजवरून सर्व प्रभागांच्या हद्द ठरवण्यात येणार आहे. २५ जून रोजी प्रभाग आरक्षणाची सोडत काढल्यानंतर हरकती व सूचना मागविण्यात येतील. १० जुलैपर्यंत राजपत्रात ते प्रसारित करण्यात येणार आहे. १५ सप्टेंबरला आचारसंहिता लागण्याची शक्यता आहे. याविषयी अतिरिक्त आयुक्त संजय घरत यांच्याशी संपर्क साधण्याचा प्रयत्न केला असता तो होऊ शकलेला नाही.