काटई मार्गावरच्या ‘त्या’ पुलाची प्रतिक्षाच, अवजड वाहने बंद पडण्याचे प्रकार सुरूच, वाहतुकीचा खोळंबा

अंबरनाथ शहरातून जाणारा अंबरनाथ काटई राज्यमार्ग वाहतुकीसाठी अत्यंत महत्वाचा आहे. या मार्गावर अंबरनाथजवळ वालधुनी नदीवर औद्योगिक वसाहतीच्या पुढे एक पूल आहे. सुमारे ४० वर्षे जुना हा पूल अंबरनाथहून काटईकडे जाणाऱ्या मार्गिकेवर तीव्र उताराचा आहे. तर अंबरनाथकडे जाणाऱ्या मार्गिकेवर हा पूल रस्त्याच्या समांतरच आहे. मात्र काटईकडे जाणाऱ्या मार्गिकेवर तीव्र उतार आणि काही क्षणात तीव्र चढ असल्याने येथे अनेक अवजड वाहनांना वाहने हाकताना त्रास होतो. अनेकदा अवजड वाहने येथून संथगतीने चालतात. अनेकदा त्यांचा वाहनावरील नियंत्रण सुटते की काय या भीतीने मागून येणारी वाहने थांबून घेतात. त्यामुळे अनेकदा अपघाताची भीतीही असते.

याच ठिकाणी सोमवारी एक अवजड वाहन बंद पडले होते. त्यानंतर सुमारे पाच तास वाहतूक संथगतीने सुरू होती. त्यामुळे वाहनांचा खोळंबा होत होता. त्याचा फटका वाहनचालकांना बसला. यापूर्वीही अनेकदा येथे वाहने बंद पडली आहेत. एका अवजड वाहनाचे नियंत्रण सुटल्याने मोठा अपघात झाला होता. त्यामुळे येथील तीव्र उतार कमी करून शेजारच्या पुलाला समांतर असा नवा पूल बांधण्याची मागणी होत होती. काटई अंबरनाथ राज्यमार्गाच्या काँक्रीटीकरणाच्या कामात या पुलासाठी १० कोटींचा निधीही मंजूर करण्यात आला होता. मात्र आजतागायक या पुलाचे काम सुरू होऊ शकलेले नाही. त्यामुळे वाहनचालकांना मोठ्या त्रासाला सामोरे जावे लागते आहे. हा पूल कधी होणार असा प्रश्न आता उपस्थित केला जातो आहे.

काम पावसाळ्यानंतरच

रस्त्याचे काम बऱ्याच ठिकाणी पूर्ण झालेले असताना हा पूल मार्गी लागत नसल्याबाबत एमआयडीसीच्या अधिकाऱ्यांना विचारले असता, पावसाळ्यानंतर या पुलाचे काम सुरू होईल असे अधिकाऱ्यांनी सांगितले आहे. काही तांत्रिक बाबी आणि परवानग्यांमुळे पुलाच्या कामाला विलंब झाला होता. त्यामुळे आता या पुलाच्या प्रक्रिया पूर्ण झाल्या असून पावसाळा सुरू असल्याने काम सुरू झाली नसल्याची बाब अधिकाऱ्यांनी सांगितली आहे. काम सुरू झाल्यानंतर सहा महिन्यात हे काम पूर्ण करण्याचा एमआयडीसीचा मानस आहे. त्यामुळे नव्या पुलासाठी २०२६ वर्ष उजाडणार असल्याचे स्पष्ट झाले आहे.