पाणकोंबडय़ा, फटाकडय़ांचे अस्तित्व धोक्यात

वाढत्या शहरीकरणामुळे पाणगवत, दलदलीची ठिकाणे नष्ट झाल्याचा परिणाम
वसई तालुक्यात पूर्वी पाणगवत, दलदल या ठिकाणी पाणकोंबडी, फटाकडी आदी पक्षी आढळायचे. मात्र वाढत्या शहरीकरणामुळे पाणगवत, दलदलीची ठिकाणे नष्ट झाली असल्याने हे पाणपक्षीही वसईतून हद्दपार होण्याच्या मार्गावर आहेत. या पक्ष्यांचे अस्तित्व धोक्यात आले असून त्यांच्या संख्येत मोठय़ा प्रमाणावर घट झाली आहे.
पावसाळ्यात पाणथळ, दलदली या ठिकाणी मोठय़ा प्रमाणावर बेडूक, खेकडे, शिंपले, मासे, जालीय किडे, अळ्या, चतुर व कीटकांचे प्रमाण वाढते. बऱ्याचदा दलदलीच्या ठिकाणी पाणगवत वाढते. हे गवत माणसाच्या उंचीएवढे वाढलेले
दिसून येते. या पाणगवतात पुष्कळ जीव राहतात. जैवविविधतेमुळे तिथे मोठी परिसंस्था तयार होते.
अशा दलदलीच्या ठिकाणी पाणपक्षी मोठय़ा संख्येने वावरताना दिसतात.
वसई तालुक्यातील दलदलीच्या ठिकाणी जिथे पाणगवत वाढलेले आहे, अशा भागांत फटाकडी, पाणकोंबडी या पाणपक्ष्यांचा मुक्त वावर असतो. मात्र नागरीकरणामुळे पाणगवत आणि दलदलीची ठिकाणे नष्ट झाल्याने या पक्ष्यांचे अस्तित्व धोक्यात आले आहे.