Viral Video: ऑफिस अवर्सनंतर ‘हा’ माऊस तुम्हाला काम करुच देणार नाही; हातातून जाणार पळून

करोनाचा प्रादुर्भाव रोखण्यासाठी २५ मार्चपासून लॉकडाउन सुरु असून आता लॉकडाउनचा पाचवा टप्पा सुरु आहे. पाचव्या टप्प्यामध्ये अनेक गोष्टी सुरु करण्याला परवानगी देण्यात आली आहे. मात्र अजूनही अनेक कार्यालये सुरु झालेली नाहीत. त्यामुळेच वर्क फ्रॉम होम करणाऱ्यांची संख्या बरीच आहे. मात्र वर्क फ्रॉम होम करताना अनेकजण वेळेपेक्षा अधिक काळ काम करत असतात. वेळेपेक्षा अधिक काळ काम करण्यासाठी मग घरातील कामांसाठी ब्रेक घेतल्याचे कारण असो किंवा इंटरनेट स्लो झाल्याचे कारण असो ऑफिसपेक्षा घरी जास्त वेळ काम करावं लागतं असं अनेकांना वाटतं. बरं सध्या वर्क फ्रॉम होम सुरु आहे म्हणून पण इतर वेळेसही वर्कोहोलिक व्यक्ती ऑफिसमधील काम करण्यासाठी ड्युटीचे तास भरल्यानंतरही बराच वेळ ऑफिसमध्ये बसून असते. अशाने त्या व्यक्तीचे खासगी आणि कामकाजाच्या म्हणजेच पर्सनल आणि प्रोफेश्नल लाइफचा समतोल म्हणजे वर्क बॅलेन्स बिघडतो. याच समस्येवर काही वर्षांपूर्वी सॅमसंगने एक भन्नाट उत्तर शोधलं होतं. ते म्हणजे वर्क बॅलेन्स करणारा माऊस. या माऊसचा व्हिडिओ मागील काही आठवड्यांपासून सोशल नेटवर्किंगवर व्हायरल झालेला पहायला मिळत आहे.