Video: “जेव्हा नवऱ्याला मनासारखी बायको भेटते”; मराठी नवरीची एंट्री होताच मारवाडी नवरदेव ढसाढसा रडला, प्रेमाचा हृदयस्पर्शी क्षण व्हायरल

प्रेम म्हणजे काय असतं हे कधी कधी शब्दांमध्ये मांडता येत नाही, पण काही क्षण असे असतात जे सारे काही सांगून जातात. असाच एक अनमोल क्षण सध्या सोशल मीडियावर व्हायरल झाला आहे, जो लाखो लोकांच्या डोळ्यांत पाणी आणतोय. हा एक लग्नातील व्हिडीओ असून त्यात दिसणारी प्रत्येक फ्रेम म्हणजे प्रेम, भावना आणि स्वप्नांची सुंदर उधळण आहे.

या व्हायरल व्हिडीओमध्ये दिसतं की, वधू सिद्धी कोलवलकर एका लोकप्रिय राजस्थानी गाण्यावर म्हणजे ‘चौधरी’वर डान्स करत करत स्टेजकडे येते. तिचं प्रत्येक पाऊल, तिची अदा, तिच्या चेहऱ्यावरचा आत्मविश्वास हे पाहून नवरदेव भरत प्रजापत भावूक होतो आणि त्याच्या डोळ्यांतून अश्रू वाहू लागतात. या क्षणाला तो स्वतःला थांबवू शकत नाही, ज्यासाठी त्याने खूप संघर्ष केला होता.

सिद्धी एक मेकअप आर्टिस्ट आहे आणि भरत पेशाने वेडिंग फिल्ममेकर आहे. या दोघांचं प्रेम या व्हिडीओच्या प्रत्येक सेकंदात जाणवतं. जेव्हा तिची एंट्री होते, तेव्हा केवळ नवरदेवाचेच नव्हे तर उपस्थित सर्वांचे डोळे पाणावतात. डान्स, भावना, परंपरा आणि सिनेमॅटिक सुंदरता यांचं हे अनोखं मिश्रण पाहून लोक फक्त एकच म्हणतात, “प्रेम जिंकलं!”

येथे पाहा व्हिडीओ

हा व्हिडीओ @clickography या इंस्टाग्राम हँडलवरून शेअर करण्यात आला असून, “जेव्हा मराठी मुलीने मारवाडी नवरदेवाला भावनांनी चकित केलं!” असं कॅप्शन देण्यात आलं आहे. आतापर्यंत २२ लाखांहून अधिक लोकांनी हा व्हिडीओ लाईक केला आहे, तर याला एक कोटी ६७ लाखांपेक्षा जास्त व्ह्युज मिळाले आहेत. कमेंट्समध्ये लोकांनी दोघांवर भरभरून प्रेम दाखवलं आहे.

कोणी म्हणालं, “त्याच्या डोळ्यातलं पाणी आणि तिच्या डोळ्यातलं तेज सगळं काही सांगून गेलं…” तर कोणी म्हणालं, “हे खरंच अमूल्य क्षण आहेत, जे शब्दांत मांडता येणार नाहीत.”