स्मार्टफोनमध्ये आग लागण्याच्या घटनांमध्ये दिवसेंदिवस वाढ होत आहे. आता शाओमीचा लोकप्रिय स्मार्टफोन Redmi Note 6 Pro ला आग लागल्याची घटना समोर आली आहे. गुजरातमध्ये हा प्रकार घडलाय.
एका लोकल सर्व्हिस सेटरमध्ये हा फोन दुरूस्त केला जात होता, त्याचवेळी आग लागल्याची घटना घडली. इंजिनिअर फोन दुरूस्त करत असताना अचानक बॅक पॅनलमधून धूर यायला सुरूवात झाल्याचं सांगितलं जात आहे. सुदैवाने या घटनेत कोणीही जखमी झाले नाही.
घटनेबाबत माहिती मिळताच शाओमीच्या प्रवक्त्यांकडून स्पष्टीकरण देण्यात आलं आहे. अधिकृत सर्व्हिस सेंटरमध्येच फोन दुरुस्तीसाठी दिला जावा असं आवाहन कंपनीकडून करण्यात आलं आहे. “घटनेनंतर आमचं एक पथक लगेच ग्राहकाकडे पोहोचलं. पण दुरूस्तीसाठी हा फोन नेण्याआधीच तो बाहेरुन ‘डॅमेज’ झाला होता. नंतर स्थानिक दुकानदाराने फोन दुरुस्त करण्याऐवजी तो अजून खराब केला. याबाबत आम्ही ग्राहकासोबत बोललोय. आम्ही सर्व ग्राहकांना अधिकृत सर्व्हिस सेंटरमध्येच फोन दुरुस्तीसाठी दिला जावा असे आवाहन करत आहोत”, अशी प्रतिक्रिया कंपनीकडून देण्यात आली आहे.
दरम्यान, फोन आधीच फिजिकली डॅमेज होता, त्यामुळेच या फोनला आग लागल्याचं सांगितलं जात आहे.
