“मॅडमजी, आम्ही इथेच शिकणार!”, असं म्हणून शाळेच्या गेटसमोर ढसाढसा का रडू लागले प्राथमिक शाळेतील मुलं, नेमकं काय घडलं, पाहा Video

दररोजप्रमाणे सोमवारी सकाळी लहानग्यांनी आपली शाळेची पोतडी घेतली, गणवेश घातला आणि आनंदात शाळेकडे पावलं टाकली. पण, जेव्हा त्यांनी शाळेचा दरवाजा बंद पाहिला, तेव्हा त्यांची आशा क्षणातच तुटली. काही मुले काही वेळ त्या बंद गेटपाशी उभी राहिली… आणि अचानक फाटलेल्या भावनांनी त्यांचा बांधच फुटला.

“मॅडमजी, आम्ही इथेच शिकणार… कुठेही जाणार नाही!” असं म्हणत एका मुलाने आपल्या शिक्षिकेला घट्ट मिठी मारली. हे दृश्य पाहून उपस्थितांचं काळीजही थरथरलं. पण, सगळ्यात जास्त मन हेलावून टाकणारा क्षण आला तो एका दिव्यांग मुलीच्या अश्रूंनी. तिच्या थरथरत्या आवाजात फक्त एवढंच निघालं, “मी आता शाळेत जाऊ शकणार नाही…” कारण नवीन शाळा लांब आहे आणि तिच्यासारख्या विद्यार्थिनीसाठी तिथपर्यंत पोहोचणं जवळपास अशक्य आहे.

या शाळेला शेजारच्या कस्तुरीटन गावातील शाळेत विलीन करण्यात आलं आहे, पण ती शाळा मुलांसाठी योग्य सुविधांशिवाय आहे. तिथं ना योग्य टॉयलेट आहे, ना दिव्यांग विद्यार्थ्यांसाठी सुविधा. गावकरी आणि पालकांनी एकच मागणी केली आहे, “जोपर्यंत नवीन शाळा पूर्ण सुसज्ज होत नाही, तोपर्यंत आमच्या जुन्या शाळेला पुन्हा सुरू करा.”

येथे पाहा व्हिडीओ

हा व्हिडीओ सोशल मीडियावर प्रचंड व्हायरल होत आहे. ट्विटरवर @SaralVyangya ह्या युजरने तो शेअर केला असून आतापर्यंत ५० हजारांहून अधिक लोकांनी पाहिला आहे. एका युजरने लिहिलं, “विद्यार्थ्यांची संख्या कमी असली तरी शाळा बंद करणं योग्य निर्णय नाही.” तर दुसऱ्यानं म्हटलं, “या मुलांच्या डोळ्यात पाणी आहे, पण आपण आपली नजर अजूनही झाकून बसणार का..?”