पाकिस्तानमध्ये पेट्रोलच्या वाढत्या किमती लोकांसाठी त्रासदायक ठरल्या आहेत. ज्या मुद्द्यांवर इम्रान खानला घेरून शाहबाज सरकार सत्तेवर आले, आता तेच मुद्दे त्यांच्यासमोर आव्हान म्हणून उभे राहिले आहेत. नुकतीच सरकारने पेट्रोलच्या दरात ३० रुपयांची वाढ केली, हा जनतेला मोठा फटका आहे. दरम्यान, इस्लामाबाद विमानतळावरील एका कर्मचाऱ्याने वाढत्या किमतींचा निषेध करताना नागरी विमान वाहतूक प्राधिकरणासमोर एक विचित्र मागणी केली आहे. गाढवावर स्वार होऊन कार्यालयात येऊ द्यावे, अशी कर्मचाऱ्यांची मागणी आहे.
एक्स्प्रेस न्यूजच्या वृत्तानुसार, सीएएच्या डीजींना लिहिलेल्या पत्रात आसिफ इक्बाल म्हणाले की, पेट्रोलच्या वाढत्या किमतींमुळेव त्यांना आपल्या वाहनातून कार्यालयात येणे शक्य नाही. त्यामुळे त्यांना कार्यालयात गाढवाची गाडी आणण्याची परवानगी देण्यात यावी, अशी मागणी त्यांनी केली आहे. इक्बाल म्हणाले की, देशात महागाई वाढत असतानाही प्राधिकरणाने वाहतूक सुविधा बंद केली आहे. त्यांनी सांगितले की पेट्रोल भत्ता आणि पिक अँड ड्रॉप सेवा दोन्ही बंद करण्यात आल्या आहेत.
अबब! कडक उन्हात पठ्ठ्याने स्कुटीच्या सीटवर बनवले डोसे; Viral Video पाहून नेटकरी हैराण
सीएएच्या प्रवक्त्याने कर्मचार्‍यांच्या मागणीला केवळ मीडिया स्टंट म्हटले आहे. प्रवक्त्याने गाढवाच्या गाडीऐवजी इस्लामाबाद-रावळपिंडी मेट्रोचा सल्ला दिला आहे. केवळ माध्यमांचे लक्ष वेधण्यासाठी हे पत्र लिहिण्यात आल्याचे त्यांनी सांगितले. पाकिस्तानमध्ये एका महिन्यापेक्षा कमी कालावधीत पेट्रोलचे दर एकूण ६० रुपयांनी वाढले आहेत. गुरुवारी शाहबाज सरकारने पेट्रोल आणि डिझेलच्या दरात लिटरमागे ३० रुपयांची वाढ केली.
नवीन किमतींनुसार आता पाकिस्तानमध्ये पेट्रोल २०९.८६ रुपये प्रति लिटर, हाय-स्पीड डिझेल २०४.१५ रुपये, रॉकेल १८१.९५ रुपये आणि लाईट डिझेल १७८.३१ रुपये दराने विकले जात आहे. सरकारच्या या निर्णयावर सोशल मीडियावर जोरदार टीका होत आहे. पाकिस्तानचे माजी पंतप्रधान इम्रान खान यांनी सरकारच्या या निर्णयावर टीका करत आमच्या सरकारने तेलाच्या किमतीत ३० रुपयांनी वाढ केली आहे, तर भारताने २५ रुपयांनी तेलाची किंमत कमी केली आहे, असे म्हटले. हे स्वतंत्र आणि गुलाम देश यांच्यातील निर्णय घेण्यातील फरक दर्शवते.
