साधरण दोन महिन्यांपूर्वी आलेली ‘विक्स’ची #TouchOfCare जाहिरात तुम्हाला नक्कीच आठवत असेल. काही जाहिराती अशा असतात की त्या मुळात विसरताच येत नाही. तृतीयपंथी गौरी सावंत आणि तिने दत्तक घेतलेल्या मुलीची कथा ही या काही सेकंदाच्या जाहिरातीतून मांडली होती. आजही या जाहिरातीतल्या गौरीला आपण विसरलो नाही. आतापर्यंत एका अनाथ मुलीला दत्तक घेऊन तिच्या भविष्यासाठी धडपडणारी गौरी एवढीच ओळख आपल्याला माहिती होती. पण गौरी यापेक्षाही खूप वेगळी आहे. समाजाने पावलोपावली तिला नाकारले. अपमानास्पद वागणूक दिली तेव्हा समाजात नेहमीच उपेक्षित असलेल्यांचे दु:ख किती बोचरे असते हे गौरीला खूप चांगले माहिती आहे. म्हणून अशांसाठी गौरी लढतेय.
वाचा : मुला-मुलींमध्ये भेदभाव करू नका!; यूपीएससी टॉपरचे आवाहन
पुण्यात वाढलेल्या गौरींनी आपलं घर केव्हाच सोडलं. तृतीयपंथी असल्याने समजातून मिळणारी वागणूक ही अपमानास्पदच होती. पण तरीही गौरी खचली नाही. तिने ‘सखी चार चौघी’ नावाची स्वयंसेवी संस्था स्थापन केली. आता देहविक्री करणाऱ्या महिलांच्या मुलांसाठी गौरी लढतेय. त्यांच्या आईप्रमाणेच या मुलांचं आयुष्य भविष्य अंधारात कोंडलं जाऊ नये एवढाच प्रयत्न तिचा आहे. म्हणूनच आपल्या स्वत:च्या मालकीची जागा देऊन तिथे या मुलांसाठी मोठं घर बांधण्याचा तिचा निर्धार आहे. ही मुलं आपल्याकडे अधिक सुरक्षित राहतील पण त्याचबरोबर या मुलांचं भविष्यही सुधारण्यास मदत होईल असं गौरीला वाटतंय. या मुलांना चांगलं शिक्षण देण्यासाठी गौरी धडपड करतेय आणि त्यासाठी मदतही गोळा करतेय. लवकरच आपलं हे स्वप्न ती पूर्ण करणार आहे आणि तिच्यामुळे अशा अनेक मुलांचं भविष्य घडणार आहे हे नक्की. काही वर्षांपूर्वी गौरीने एका अनाथ मुलीला दत्तक घेतलं होतं, गायत्री असं तिचं नाव. या मुलीच्या संगोपनापासून ते शिक्षणापर्यंतचा सगळा खर्च गौरी स्वत: करते.
