Viral Video: प्रेम ही एक खूप सुंदर आणि निर्मळ भावना आहे. ज्या व्यक्तीवर आपले प्रेम असते त्या व्यक्तीसाठी आपण काहीही करायला तयार असतो. पण, हल्ली असं निर्मळ आणि नि:स्वार्थी प्रेम फार क्वचित पाहायला मिळतं. अलीकडच्या काळातील अनेक तरुण-तरुणींना प्रेम म्हणजे केवळ एकमेकांच्या अपेक्षा पूर्ण करणं याच गोष्टींकडे लक्ष असतं, त्यामुळे जेव्हा त्या अपेक्षा पूर्ण होत नाहीत, त्यावेळी ते नातंदेखील तुटतं. पण, आपल्या आधीच्या पिढीसाठी प्रेम केवळ अपेक्षा पूर्ण करणं नसून एकमेकांच्या सुख-दुःखात एकमेकांना साथ देणं, परिस्थिती समजून घेणं, कधीतरी आपल्या जोडीदारला एखादी गोष्ट आवडते म्हणून त्याच्यासाठी ती आवडीने करणं, याला खरं प्रेम म्हणतात.
हल्लीचा बदलणारा काळ बघता प्रेम, लग्न फार काळ टिकत नाहीत, त्यामुळे ते दोघं एकमेकांना आयुष्यात कितपत साथ देतील हे सांगता येत नाही. अनेकदा सोशल मीडियावर वृद्ध जोडप्यांचे अनेक व्हिडीओ व्हायरल होत असतात, ज्यामध्ये त्यांचे प्रेम पाहून आपल्यालाही हेवा वाटतो. आता व्हायरल होत असलेल्या व्हिडीओमध्येही असंच काहीतरी पाहायला मिळत आहे.
सध्या सातारा जिल्ह्यातील कास पठारावरील बहरलेली विविध जातीची फुलं पाहण्यासाठी अनेकजण गर्दी करत आहेत. याचदरम्यान, एक आजी-आजोबादेखील हे मनमोहक निसर्गरम्य दृश्य पाहण्यासाठी गेले होते. यावेळी त्यांनी एक सुंदर व्हिडीओ देखील बनवला. जो सध्या सोशल मीडियावर खूप व्हायरल होत आहे.
या व्हिडीओमध्ये तुम्ही पाहू शकता, एक आजोबा शेजारी उभ्या असलेल्या त्यांच्या पत्नीसाठी कॅमेऱ्यामध्ये बघून छान गाणं गातात. यावेळी ते “तुझी चाल तुरू तुरू उडते केस भुरू भुरू”, हे गाणं गातात. ६०-६५ पार केलेल्या आजोबांचा आवाजही त्यांच्या मनाइतकाच तरूण आहे. सध्या त्यांचा हा व्हिडीओ खूप चर्चेत आला. नेटकरीही त्यांचे खूप करत आहेत.
पाहा व्हिडीओ:
हा व्हिडीओ इन्स्टाग्रामवरील @banpurikarmama या अकाउन्टवर शेअर केला असून या व्हिडीओवर आतापर्यंत ३ लाखाहून अधिक व्ह्यूज तर हजारो लाइक्स मिळाल्या आहेत. तसेच अनेक नेटकरी या व्हिडीओ वर कमेंट्स करताना दिसत आहेत. एकाने लिहिलंय की, “असं प्रेम टिकवता आले पाहिजे लय भारी बाबा छान”, दुसऱ्याने लिहिलंय की, “बाबांचं प्रेम तरी खरं आहे”, तर तिसऱ्याने लिहिलंय की, “बाबा एकच नंबर…माणसाने शरीराने म्हातारं व्हावं पण मनानं तरुण रहावं….तुम्ही हे सिद्ध केलं.”
