विरार मध्ये वचनपुर्ती जल उत्सव कार्यक्रमात गोंधळ; भाजप आणि महाविकास आघाडी यांच्यात संघर्ष पेटला

रस्त्यावरच हा कार्यक्रम ठेवण्यात आल्याने काही काळ रस्ते बंद होते. या रस्ते अडवणूकीच्या मुद्द्यावरून नागरिक आणि आयोजक यांच्या वाद निर्माण झाला होता. त्यातच एका महिला युट्युबर पत्रकाराला कार्यक्रमादरम्यान धक्काबुक्की झाल्याने वाद आणखीनच चिघळला आहे. एकाने जय श्रीरामच्या घोषणा देत अश्लील वर्तन करत धक्काबुकी केली, असा गंभीर आरोप करण्यात आला. त्या युट्यूबर तरुणीच्या तक्रारीवरून बोळींज पोलीस ठाण्यात अज्ञात व्यक्तीविरोधात गुन्हा दाखल करण्यात आला आहे.

तणावपूर्ण वातावरण

 या प्रकरणामुळे रात्री दोन वाजेपर्यंत पोलीस ठाण्याबाहेर तणावपूर्ण वातावरण निर्माण झालं होतं. पोलिसांच्या भूमिकेवर महाविकास आघाडीच्या नेत्यांनी प्रश्नचिन्ह उपस्थित केले आहे.घटनेनंतर बविआचे माजी आमदार क्षितिज ठाकूर, शिवसेना ठाकरे गटाचे जनार्दन पाटील व  त्यांचे कार्यकर्ते

मोठ्या संख्येने पोलीस ठाण्यात पोहोचले होते. ज्यामुळे काहीकाळ तणाव वाढला होता. कार्यक्रमात झालेल्या या प्रकारामुळे विरारमध्ये भाजप आणि महाविकास आघाडी यांच्यातील संघर्ष पुन्हा एकदा पेटला आहे. तर महिला पत्रकारासोबत घडलेल्या अपमानास्पद घटनेमुळे सामाजिक माध्यमांवर संतापाची लाट उसळली असून, नागरिकांनी महिलांवरील अशा वर्तनाविरोधात कठोर कारवाईची मागणी करण्यात येत आहे.