श्रीसूर्याचा अमरावतीकरांना तब्बल २० कोटींचा फटका

दामदुपटीचे आमीष दाखवून गुंतवणूकदारांची फसवणूक करणाऱ्या श्रीसूर्या समूहाने अमरावतीकरांना तब्बल २० कोटी रुपयांनी गंडवल्याची माहिती पोलीस तपासातून उघड झाली आहे. श्रीसूर्या समूहाच्या विरोधात अमरावती जिल्ह्य़ातील सुमारे २५० गुंतवणूकदारांनी तक्रारी दाखल केल्या होत्या. त्यात बहुतांश ग्राहक महावितरण, एस.टी. महामंडळ आणि खाजगी कंपन्यांमधून सेवानिवृत्त झालेल्या कर्मचाऱ्यांचा समावेश आहे. समीर जोशी आणि पल्लवी जोशी या दोघांना येथील आर्थिक गुन्हे शाखेच्या पथकाने ताब्यात घेतले आहे.
सुरुवातीला हा घोटाळा १८ कोटी रुपयांचा असल्याचे चित्र समोर आले होते, पण येथील आर्थिक गुन्हे शाखेच्या आतापर्यंतच्या तपासातून अमरावतीकरांची २० कोटी रुपयांनी फसवणूक करण्यात आल्याचे निदर्शनास आले आहे. पोलिसात तक्रार देणाऱ्या गुंतवणूकदारांची संख्या आता अडीचशेपर्यंत पोहोचली आहे. या प्रकरणात अमरावती पोलिसांनी आतापर्यंत कुणालाही अटक केलेली नसली, तरी येत्या काही दिवसात कारवाईची शक्यता वर्तवली जात आहे. अधिक व्याजाचे आमीष दाखवून श्रीसूर्या समूहाने राज्यातील सुमारे पाच हजारांहून अधिक गुंतवणूकदारांची अडीचशे कोटी रुपयांनी फसवणूक केल्याचे आतापर्यंत उघड झाले आहे. त्यातील सर्वाधिक ग्राहक विदर्भातील आहेत. श्रीसूर्या समूहाचा संचालक समीर जोशी आणि पल्लवी जोशी यांनी एजंटांच्या माध्यमातून गुंतवणूकदारांना आकर्षित केले. अधिक व्याज दर मिळत असल्याने अनेक जण श्रीसूर्याच्या जाळ्यात ओढले गेले. काही दिवसांपूर्वी पोलिसांनी शंतनू कुऱ्हेकर, मुकूंद पितळे, अनंत जहागीरदार, मोहन पितळे, नितीन केसकर, प्रकाश राऊत, अंजली काशिकर या एजंटांच्या विरोधात गुन्हे दाखल केले. त्यांना तात्पुरता अटकपूर्व जामीन मंजूर झाला आहे. पोलिसांनी शुक्रवारी कुऱ्हेकर आणि पितळे यांच्या कार्यालयाला देखील सील ठोकले होते.
तक्रारकर्त्यांची संख्या दिवसेंदिवस वाढतच चालली असून आयकर विभागाच्या भीतीमुळे अनेकांनी तक्रार करणे टाळले होते, तेही आता समोर येऊ लागले आहेत. पोलिसांनी आरोपींच्या विरोधात पुरावे गोळा करण्याचे काम सुरू केले आहे. अमरावती पोलिसांना समीर जोशी आणि पल्लवी जोशी यांना नागपूर पोलिसांकडून आजच ताब्यात घेतले आहे.
आर्थिक गुन्हे शाखेमार्फत या प्रकरणाचा तपास सुरू आहे. श्रीसूर्या समूहाने अमरावती जिल्ह्य़ातील अंजनगाव सुर्जी येथे मालमत्ता खरेदी करून ठेवल्या आहेत. नागपूरच्या पोलीस पथकाने काही दिवसांपूर्वी या मालमत्तेविषयी चौकशी केली. श्रीसूर्या समूहाने अंजनगावातील एक बंद पडलेली ऑईल मिल विकत घेतली होती. या ठिकाणी तांदळापासून बनवलेल्या तेलाचे आणि फल्ली तेलाचे उत्पादन करण्यात येणार असल्याचे सांगण्यात आले होते, पण काही दिवसांनंतर हे उत्पादन बंद करून श्रीसूर्या उद्योगाने या ठिकाणी इतर राज्यांमधून सोयाबीन तेल आणून पॅकिंग करण्याचे काम सुरू केले. त्यात गुजरातच्या दोन कंपन्यांची देखील कोटय़वधी रुपयांनी फसवणूक करण्यात आली आहे. सेवानिवृत्तीनंतर मिळालेली एकमुस्त रक्कम अधिक व्याज दर देणाऱ्या कंपनीत गुंतवून चांगली कमाई करण्याच्या नादात अनेक गुंतवणूकदार श्रीसूर्याच्या आमीषाला बळी पडले. यात अनेकांवर आपल्या आयुष्याची पूर्ण कमाई गमावण्याची वेळ आली आहे. सुरुवातीच्या काळात परतावे चांगले मिळाल्याने लोकांचा या कंपनीवर विश्वास बसला. श्रीसूर्या समूहाने अनेक सांस्कृतिक आणि सामाजिक कार्यक्रमांसाठी संस्थांना आर्थिक मदतही केली होती.