उरणच्या द्रोणागिरी नोड परिसरातील रस्ते खड्डेमुक्त होणार

३२ कोटी रुपयांची तरतूद
सिडकोच्या माध्यमातून विकसित करण्यात आलेल्या उरणमधील द्रोणागिरी नोडमधील नागरी सुविधा देण्याची जबाबदारी सिडकोची असताना मागील अनेक वर्षांपासून नवघर ते खोपटे परिसरातील रस्त्यांना पडलेल्या खड्डय़ांमुळे अनेकांना आपले जीव गमवावे लागले आहेत. दरम्यान, सिडकोने द्रोणागिरी नोडमधील आयओटीएल ते खोपटा पूल दरम्यानच्या रस्त्याच्या दुरुस्तीचे काम सुरू केले असून त्यासाठी तब्बल ३२ कोटी रुपयांची तरतूद करण्यात आली आहे.
आयओटीएल ते खोपटा तसेच नवघर आणि भेंडखळ परिसरातील विविध कंपन्यांच्या गोदामातून दररोज हजारोंच्या संख्येने अवजड कंटेनर बाहेर पडत आहेत. त्यामुळे या रस्त्याला भले मोठे खड्डे पडले आहेत. अनेक ठिकाणी तर रस्त्याऐवजी खडीचाच रस्ता दिसत होता.
या रस्त्याच्या दुरुस्तीची मागणी येथील प्रवाशांकडून सातत्याने केली जात आहे.
सिडकोच्या वतीने यासंबंधी सर्वेक्षण करून आयओटीएल ते खोपटा पूल दरम्यानच्या साडेसात किलोमीटरच्या रस्त्यावरील वाहतुकीचा अभ्यास केला. त्यानंतर रस्ताबांधणीचा नवा प्रस्ताव तयार करण्यात आला असून त्यासाठी सुमारे ३२ कोटी रुपयांचा अंदाजे खर्च अपेक्षित आहे.
पावसाळा असल्याने रस्त्याचे काम खोळंबले होते. सद्यस्थितीत या कामाला सुरुवात करण्यात आली असून खोपटा पुलापासून रस्त्याचे काम सुरू करण्यात आले आहे. हे काम येत्या १८ महिन्यांत पूर्ण करण्यात येणार आहे. त्यामुळे खोपटा, नवघर, भेंडखळ व पागेटे परिसरातील रस्ते खड्डेमुक्त होणार आहेत.