वाशीत काँग्रेसचा नैतिकतेचा ढोल फुटला

राज्यातील सत्तेचा सुकाणू हातात असलेल्या काँग्रेस पक्षाचा वाशी येथील एका साध्या पोटनिवडणुकीत नैतिकतेचा ढोल रविवारी फुटला. राष्ट्रवादी काँग्रेस पक्षाच्या उमेदवाराविरुद्ध प्रतिष्ठेची निवडणूक करताना काँग्रेसने येथे शिवसेनेसारख्या परंपरागत आणि जातीयवादी म्हणून हिणवणाऱ्या पक्षाबरोबर हातमिळवणी केली. काँग्रेस पक्षाच्या ऐरोली येथील माजी नगरसेविका शशिकला काळे यांच्या विरोधात मात्र राष्ट्रवादीने सहा वर्षांपूर्वी उमेदवार उभा न करता त्यांना बिनविरोध निवडून दिले होते, पण काँग्रेसने तो धर्म पाळला नाही. काळे यांचा खून झाल्याने ऐरोलीत त्या वेळी पोटनिवडणूक झाली होती. नवी मुंबई पालिकेच्या वाशी येथील प्रभाग क्रमांक ४८ साठी रविवारी मतदान झाले. त्यात राष्ट्रवादीच्या रोहिणी शिंदे २९० मतांनी विजयी झाल्या. काँग्रेसचे सुरेश शिंदे यांचा या लढतीत पराभव झाला. राज्याच्या आणि शहराच्या दृष्टीने ही निवडणूक फुटकळ असली तरी या निवडणुकीमुळे स्थानिक काँग्रेसचे अंतरंग स्पष्ट झाले आहे. राज्यात मित्रपक्ष असणारा राष्ट्रवादी आपल्याला मोठा काय छोटा भाऊ मानायला तयार नाही, अशी नवी मुंबईतील काँग्रेसच्या कार्यकर्त्यांची भावना आहे. त्याचा रोष अनेक वेळा जाहीर झाला आहे. त्यामुळेच मागील विधानसभा निवडणुकीत काँग्रेसचे नामदेव भगत बेलापूर मतदारसंघातून पालकमंत्री गणेश नाईक यांच्या विरोधात उभे राहिले आणि दारुण पराभवाचे धनी झाले. पालिकेत लोकप्रतिनिधी प्रशासन आल्यापासून दोन्ही काँग्रेस एकमेकांचे कट्टर विरोधक आहेत. दोन्ही काँग्रेस एकमेकांना झुकते माप दाखविण्याची एकही संधी सोडत नाही. त्यासाठी ते काहीही करण्यास तयार असल्याचे दिसून आले आहे. याच मत्सरातून रविवारी झालेल्या पोटनिवडणुकीत काँग्रेसने शिवसेनेचे धनुष्य आपल्या हातात घेऊन प्रचार केला. त्यामुळे काँग्रेसच्या उमेदवाराला हजाराचा आकडा गाठता आला, मात्र राष्ट्रवादीच्या रोहिणी शिंदे पतीपेक्षा दुप्पट मताधिक्याने निवडून आल्या, पण त्यासाठी त्यांना बरीच धावपळ करावी लागली. एका आजारी विधवेला काँग्रेसमुळे पायपीट करावी लागल्याने मतदारांच्यात नाराजी होती. नाईक यांच्यावरील आकसापोटी काँग्रेसने शिवसेनेबरोबर छुपी युती करून आपल्या धर्मनिरपेक्ष पक्षाची नैतिकता सांभाळली नाही. त्यामुळे यात काँग्रेसचा फुगा फुटला. एके काळी काँग्रेसचा बालेकिल्ला असणाऱ्या बेलापूर पट्टीत (आत्ताच्या नवी मुंबईत) काँग्रेस चटणीला शिल्लक असून पालिकेतील विरोधी पक्ष पददेखील या पक्षाच्या हातातून गेलेले आहे. पाच वर्षांपूर्वी किमान विरोधी पक्षात असलेल्या काँग्रेसच्या विद्यमान १३ नगरसेवकांमुळे बारा वाजण्याची वेळ आली आहे. रविवारी झालेल्या पोटनिवडणुकीत काँग्रेसने आपला उमेदवार उभा करू नये असा एक मतप्रवाह होता, कारण शिंदे यांचे पती रमेश शिंदे यांचे कर्करोगाने निधन झाले होते. त्यांच्या प्रति संपूर्ण शहरात एक सहानुभूती होती. शिंदे तीन वेळा या प्रभागातून निवडून आलेले होते आणि कार्यक्षम नगरसेवक म्हणून त्यांची ख्याती होती. माणूस म्हणूनदेखील ते चांगले ओळखले जात होते. त्यामुळे काँग्रेस वगळता एकाही पक्षाने उमेदवार उभा केला नाही. त्यात विद्यमान लोकसभा, विधानसभा आणि पालिकांच्या निवडणुकांमुळे नगरसेवकांचा कालावधी इनमीन सहा महिन्यांचा मिळणार आहे. काँग्रेस वगळता हे सर्व पक्षांना कळले, पण काँग्रेसचे जिल्हाध्यक्ष दशरथ भगत, त्यांचे पुतणे करसन भगत, अविनाश लाड, संतोष शेट्टी, अनिल कौशिक यांसारख्या स्थानिक पुढाऱ्यांनी उमेदवार उभा करण्याचा हट्ट धरला. तो ब्लॉक अध्यक्ष सुरेश शिंदे यांच्या रूपात पूर्ण करण्यात आला. नाईक यांना चारीमुंडय़ा चीत करण्यासाठी दशरथ भगत यांनी भाजपच्या सुरेश हावरे यांनादेखील पाठिंबा देण्याची तयारी भावे नाटय़गृहात जाहीर केली होती. त्यामुळे काँग्रेसची देश आणि राज्य पातळीवरील काहीही ध्येयधोरणे असली तरी नवी मुंबईत काँग्रेस ते वेगळ्या पध्दतीने राबविताना दिसत आहे. दोन काँग्रेसच्या लढाईत दोन शिंदेंपैकी राष्ट्रवादीच्या शिंदे निवडून आल्या आणि काँग्रेसचे सुरेश शिंदे तोंडघशी पडले.
या निवडणुकीमुळे दोन काँग्रेसमधील दरी अधिक वाढली असून लोकसभा निवडणुकीत काँग्रेस राष्ट्रवादीच्या उमेदवाराला मदत करणार नाही, ही काळ्या दगडावरची पांढरी रेघ असल्याचे स्पष्ट झाले आहे.