डोंबिवली पूर्व, नेहरू मैदान भागातील इंदिरा निवास ही अतिधोकादायक इमारत गुरुवारी दुपारी पालिकेच्या ‘फ’ प्रभागाच्या पथकाने जेसीबीच्या साहाय्याने जमीनदोस्त केली. लोडबेअरिंग पद्धतीची चार माळ्याची ही इमारत होती. या इमारतीत एक कुटुंब राहत होते. महापालिकेने यापूर्वीच या इमारतीच्या मालकाला इमारत धोकादायक झाल्याची नोटीस दिली होती. त्यामुळे येथे रहाणारे कुटुंब इमारत सोडून अन्यत्र राहण्यास गेले होते. पावसाळ्यापूर्वी अतिधोकादायक इमारती असतील त्या तोडण्याचे आदेश पालिका आयुक्त श्यामसुंदर पाटील यांनी दिले आहेत. त्याप्रमाणे ‘फ’ प्रभाग अधिकारी विनायक पांडे, राठोड, संजय कुमावत यांच्या पथकाने ही कारवाई केली. यावेळी अग्निशमन दल, महावितरणचे कर्मचारी उपस्थित होते.
