घरांचा दर कमी ठेवण्यासाठी आकाराला कात्री

अत्यल्प उत्पन्न गटातील लोकांना २६९ चौरस फुटांची ‘प्रशस्त’ घरे महाग वाटतात? ठीक आहे, मग त्यांना आपण पावणेदोनशे फुटांचे घर कमी किमतीला बांधून देऊ.. हा विचार आहे ‘म्हाडा’मधील वरिष्ठ अधिकाऱ्यांचा. जमिनीसाठी पैसे द्यावे लागत नसूनही त्यावर बांधलेल्या घरांचे दर खुल्या बाजारातील घरांएवढेच ठेवणारी म्हाडा आता एका कुटुंबाला लागणारे किमान घरही आणखी १०० चौरस फुटांनी कमी करण्याचा उफराटा विचार करीत आहे. अत्यल्प उत्पन्न गटातील लोकांसाठी ‘म्हाडा’ची २६९ चौरस फुटांची घरे भलतीच महाग ठरू लागल्याने ही गरिबांची क्रूर चेष्टा असल्याचा सूर उमटू लागला आहे. या पाश्र्वभूमीवर या उत्पन्न गटातील लोकांसाठी सुमारे पावणेदोनशे चौरस फुटांची छोटी घरे बांधल्यास घराच्या किमतीचा प्रश्न निकाली निघेल असा विचार ‘म्हाडा’मध्ये सुरू झाला आहे. घरांचा दर आटोक्यात ठेवण्याऐवजी घराच्या आकाराला कात्री लावण्याचा प्रकार म्हणजे उफराटा कारभार असल्याचा सूर उमटत आहे. गेल्या काही वर्षांत ‘म्हाडा’च्या घरांचा दर मुंबईत बिल्डरांच्या दरांच्या आसपास पोहोचला आहे. त्यामुळे सर्वसामान्यांसाठी घरांची बांधणी करणारी ‘म्हाडा’ ही ओळख पुसली जाऊन तिचे रूपांतर ‘सरकारी बिल्डर’ असे झाले आहे. त्यात भर म्हणून घरांची सोडत निघाल्यानंतर ताबा देताना या घरांच्या किमती अडीच लाखांपासून १५ लाखांपर्यंत वाढवण्याची किमया ‘म्हाडा’ने केली आहे. या पार्श्र्वभूमीवर यंदाच्या ‘म्हाडा’च्या घरांच्या किमती या अत्यल्प उत्पन्न गटातील घरांसाठी साडेसोळा लाख रुपये अशी ठरवण्यात आली असून या घरांचा आकार २६९ चौरस फूट इतका आहे.