रूग्णालयातील खाटांप्रमाणे पालिका जैविक कचऱ्याचा दर आकारणार

कल्याण डोंबिवलीतील रूग्णालयात निघणारा जैविक कचरा यापूर्वी वजनाप्रमाणे महापालिकेच्या खासगी एजन्सीकडून जमा केला जात होता. हा कचरा गेल्या आठवडय़ापासून नागपूरच्या मे.एसएमएस इन्फ्रास्ट्रक्चर या नवीन एजन्सीकडून रूग्णालयातील खाटांच्या हिशोबाप्रमाणे उचलला जात असल्याने वैद्यकीय व्यवसायिकांमध्ये नाराजी व्यक्त केली जात आहे.
कल्याण डोंबिवली पालिका, बदलापूर, उल्हासनगर, भिवंडी, शहापूर, अंबरनाथ परिसरातील ९८४ रूग्णालय,  प्रयोगशाळा, दवाखान्यांमधील जैविक, वैद्यकीय कचरा जमा करून त्याच्यावर प्रक्रिया करण्याचे काम मे. पी.आर.एस.एन्टरप्राईसेस ही एजन्सी करीत होती. कल्याणजवळील उंबर्डे येथे हा प्रकल्प आहे. रूग्णालयांमधून निघणारा जैविक कचरा उचलण्याचे दर किलोप्रमाणे आकारला जात होता. गेल्या काही दिवसांपुर्वी या कामासाठी नव्याने निवीदा काढण्यात आल्या.  
नागपूरच्या मे.एसएमएस एजन्सीला महापालिकेमार्फत हे काम देण्यात आले आहे.  यापूर्वी मे. पीआरएस ही एजन्सी जैविक कचरा जमा करताना प्रती किलोप्रमाणे असा दर आकारत होती. त्यामुळे काही रुग्णालयातील व्यवस्थापनामार्फत जैविक कचऱ्याची परस्पर विल्हेवाट लावली जात असल्याच्या तक्रारी केल्या जात होत्या. त्यामुळे डॉक्टरांकडून होणारा गैरप्रकार रोखण्यासाठी नवीन ठेका देताना महापालिकेने रूग्णालयात किती खाटा आहेत त्याप्रमाणे जैविक कचऱ्यावर दर आकारणीस सुरूवात केली आहे. रूग्णालयात कचरा खाटांनुसार उचलणे योग्य नसल्याचे डॉक्टरांच्या शिष्टमंडळाने प्रशासनाच्या निदर्शनास आणले आहे.