शिवसेनेची ‘उडी’ अन् मनसेची ‘दडी’

जीव धोक्यात
खड्डय़ांमुळे रस्त्यावरून दुचाकीने तर सोडाच पण पायी चालणेही अवघड झाले आहे. चालताना कपडे सांभाळायचे की आपला जीव ? वेगवेगळ्या कामांसाठी चांगले रस्ते तोडण्याची प्रक्रिया अव्याहतपणे सुरू असते. पावसाळा सुरू झाला की, त्यावर डागडुजीला सुरूवात करायची हे नेहमीचे झाले आहे. मुळात रस्त्यालगतच्या गटारी किंवा मोकळ्या जागांवर अनेकांनी अतिक्रमण केले आहे. या अतिक्रमणामुळे पाणी वाहून जाण्यास जागा नाही. रस्त्यांचा उतार बरोबर नाही. यामुळे पाणी ठराविक ठिकाणी साचते. त्याचा अंदाज न आल्याने अपघातही घडू शकतात. शिवाय ठेकेदारांकडून गल्लीबोळात बांधलेल्या रस्त्यांचा दर्जा अतिशय निकृष्ट आहे. आपल्याकडे समस्या निर्माण झाल्यावर नस्ती उठाठेव होते. मुळात ती उद्भवणार नाही, यादृष्टिने नियोजन करण्यास कोणाला ही वेळ नाही.
सेफ सय्यद

रस्त्यात खड्डा की खड्डय़ात रस्ता?
शहरात पसरलेले खड्डय़ांचे साम्राज्य पाहता रस्त्यात खड्डा की खड्डय़ात रस्ता असा प्रश्न पडतो. महापालिकेच्या निवडणुकीच्या वेळी नवनिर्माणाची टिमकी वाजविणाऱ्या महाराष्ट्र नवनिर्माण सेनेने हेच ‘नवनिर्माण’ केले असेच मत तयार होत आहे. खराब रस्त्यांमुळे वाहनांचे नुकसान तर होतेच. शिवाय अनेकदा अपघातही घडतात. याबाबत टीव्ही, रेडिओ विविध माध्यमातून चर्चा केली जात आहे. अद्याप प्रशासनाला पुरती जाग आलेली नाही. कुठलीही सामाजिक  संस्था वा राजकीय पक्ष खंबीर भूमिका घ्यायला तयार नाही. एकीकडे कुंभमेळ्याची चर्चा होत असतांना दुसरीकडे रस्त्यांची गुणवत्ता सुधारण्याच्या दृष्टिने कोणताही विचार होत नाही.                         – स्वप्नील जोशी

खड्डय़ात पहावे पडून..
पावसाळा म्हटले की डोळ्यांसमोर खड्डय़ांमुळे रस्त्यांची झालेली चाळणी दिसते. नेहमीच येतो पावसाळा म्हणण्यापेक्षा आता नेहमीच येतो खड्डा असे म्हणण्याची वेळ आली आहे. प्रशासन व लोकप्रतिनिधींची उदासीनता किती वेळ सहन करायची? महापालिकेच्यावतीने रस्त्यात खड्डा दिसला की लगेच खडी किंवा रेती टाकून काही ठिकाणी तर विटांचे तुकडे टाकून तात्पुरत्या स्वरूपात मलमपट्टी करण्यात येते. मात्र ही मलमपट्टी एखाद्याचा जीव घेऊ शकते, हे कोणाच्या लक्षात येत नाही. एरवी कुठल्याही कारणाने पेटून उठणारे राजकीय पक्ष या प्रश्नाबाबत अद्याप रस्त्यावर आलेले नाहीत. एकमेकांवर चिखलफेक करण्यापेक्षा आता प्रत्यक्ष कृतीची गरज आहे. मध्यंतरी राज ठाकरे यांचे शिष्टमंडळ पाहणी करून गेले. त्यानंतर पावसाळ्याच्या धर्तीवर महापालिकेच्या मुखंडानीही पाहणी केली. मात्र या पाहणीत रस्त्यांची दुरावस्था एकाच्याही नजरेत पडली नाही हे आपले दुर्देव म्हणावे लागेल. रस्त्यांवरील खड्डय़ात बळी जाण्याआधीच या संदर्भात ठोस पावले उचलण्याची गरज आहे.
प्रा. डॉ. वृन्दा भार्गवे

कायमस्वरूपी उपाय आवश्यक
पावसाळ्याच्या पुर्वार्धातच रस्त्यावर मोठय़ा प्रमाणावर खड्डे दिसत आहेत. याबाबत महापालिकेच्यावतीने जी डागडुजी होते ती केवळ तात्पुरत्या स्वरूपाची. रस्त्याचे काम निकृष्ट दर्जाचे असते. पालिका अशा कामातून ठेकेदाराचे हित जोपासत असली तरी नागरिकांच्या जिविताकडे सोयीस्करपणे दुर्लक्ष होत आहे. यावर कायमस्वरूपी उपाय गरजेचा आहे. शहरात सध्या प्लास्टिक प्रदुषण मोठय़ा प्रमाणावर होत आहे. जमा होणाऱ्या प्लास्टिकचा डांबरीकरणात वापर केला तर दरवर्षी होणारा खर्च काही अंशी वाचविता येईल. त्यामुळे पालिकेवरील बोजा कमी होईल आणि कामाचा दर्जाही सुधारू शकतो.             
– प्रा. आनंद बोरा