आम्हीच सर्वोत्तम आहोत, हे पुन्हा एकदा भारतीय संघाने विश्वचषकाच्या अखेरच्या साखळी सामन्यातही दाखवून दिले. सुदैवी सुरेश रैनाचे नाबाद शतक आणि महेंद्रसिंग धोनीच्या आत्मविश्वासपूर्ण नाबाद ८५ धावांच्या खेळीच्या जोरावर भारताने झिम्बाब्वेवर ६ विकेट्स राखून विजय मिळवत ‘ब’ गटामध्ये अपराजित राहण्याची किमया साधली. झिम्बाब्वेने ब्रेंडन टेलरच्या अप्रतिम शतकाच्या जोरावर २८७ धावा उभारल्या होत्या. या आव्हानाचा पाठलाग करताना भारताचे पहिले चारही फलंदाज शतकाची वेस ओलांडण्यापूर्वीच तंबूत परतले होते. पण रैना आणि धोनी यांनी सुंदर खेळी साकारत संघाच्या विजयावर शिक्कामोर्तब केले.भारताने नाणेफेक जिंकत झिम्बाब्वेला फलंदाजीला पाचारण करत त्यांनी ३ बाद ३३ अशी अवस्था केली. भारतीय संघ झिम्बाब्वेला झटपट गुंडाळेल, असे वाटत असतानाच आपला अखेरचा सामना खेळणाऱ्या टेलरने संघाचा डाव सावरला. भारतीय गोलंदाजीचा सुरुवातीला संयमपणे सामना करणाऱ्या टेलरने स्थिरस्थावर झाल्यावर मोठी फटकेबाजी करत शतक झळकावले. त्याला या वेळी शॉन विल्यम्सने (५०) अर्धशतक झळकावत चांगली साथ दिली. या दोघांनी चौथ्या विकेटसाठी ९७ धावांची भागीदारी रचली. शॉन बाद झाल्यावरही टेलरने भारतीय गोलंदाजांचा समर्थपणे सामना करत शतक झळकावले. टेलरने ११० चेंडूंत १५ चौकार आणि ५ षटकारांच्या जोरावर १३८ धावांची अप्रतिम खेळी साकारली. मोहित शर्माला मोठा फटका मारण्याच्या प्रयत्नांमध्ये टेलरने आपली विकेट गमावली आणि झिम्बाब्वेला तीनशे धावांचा पल्ला गाठण्यापासून वंचित राहावे लागले. अखेरच्या षटकांमध्ये मोठी फटकेबाजी करण्याच्या नादात झिम्बाब्वेने फलंदाज गमावले आणि त्यांना २८७ धावाच करता आल्या. भारताकडून मोहम्मद शमी, मोहित शर्मा आणि उमेश यादव यांनी प्रत्येकी तीन बळी मिळवले.झिम्बाब्वेच्या आव्हानाचा पाठलाग करताना भारताने २१ धावांमध्ये दोन्ही फलंदाज गमावले. त्यानंतर अजिंक्य रहाणे (१९) आणि विराट कोहली (३८) यांनी अर्धशतकी भागीदारी रचली, पण या दोघांनाही मोठी खेळी साकारता आली नाही आणि भारताची ४ बाद ९२ अशी अवस्था झाली. पण यानंतर रैना आणि धोनी यांनी पाचव्या विकेटसाठी १९७ धावांची अभेद्य भागीदारी रचत संघाला विजय मिळवून दिला. रैनाला ४७ धावांवर असताना सिकंदर रझाच्या गोलंदाजीवर हॅमिल्टन मसाकाझाने जीवदान दिले आणि या जीवदानाचा पुरेपूर फायदा उठवत रैनाने शतक झळकावत संघाला विजय मिळवून दिला. रैनाने ९ चौकार आणि ४ षटकारांच्या जोरावर नाबाद ११० धावांची खेळी साकारली, तर धोनीने ८ चौकार आणि २ षटकारांच्या जोरावर नाबाद ८५ धावांची खेळी साकारली.संक्षिप्त धावफलकझिम्बाब्वे : ४८.५ षटकांत सर्व बाद २८७ (ब्रेंडन टेलर १३८, शॉन विल्यम्स ५०; उमेश यादव ३/४३) पराभूत वि. भारत : ४८.४ षटकांत ४ बाद २८८ (सुरेश रैना नाबाद १३८, महेंद्रसिंग धोनी नाबाद ८५; टिनाशे पयंगारा २/५३).सामनावीर : सुरेश रैना.१९६ विश्वचषकामध्ये धावांचा पाठलाग करताना सुरेश रैना आणि महेंद्रसिंग धोनी यांची नाबाद १९६ धावांची भागीदारी सर्वोत्तम ठरली आहे. त्याचबरोबर यंदाच्या विश्वचषकातील भारताचीही ही सर्वोत्तम भागीदारी ठरली आहे.धोनीने लॉइड यांना मागे टाकलेविश्वचषकात सलग दहा सामन्यांमध्ये विजय मिळवत भारताचा कर्णधार महेंद्रसिंग धोनीने वेस्ट इंडिजचे माजी महान कर्णधार क्लाइव्ह लॉइड यांना मागे टाकले आहे. लॉइड यांनी विश्वचषकात सलग ९ सामने जिंकले होते. सलग दहा विजयांसह धोनी दुसऱ्या स्थानावर असून अव्वल स्थानावर ऑस्ट्रेलियाचा माजी कर्णधार रिकी पॉन्टिंग (सलग २४ विजय) आहे.भारताची उपांत्यपूर्व लढत १९ मार्चला भारताचा उपांत्यपूर्व फेरीचा सामना बांगलादेशविरुद्ध १९ मार्चला होणार आहे. हा सामना मेलबर्न क्रिकेट ग्राऊंडवर होणार आहे.हा विजय आमच्यासाठी महत्त्वाचा आहे. कारण या सामन्यामध्ये पहिल्या चार फलंदाजांनी चांगली फलंदाजी केली नसली तरी त्यानंतरच्या फलंदाजांना पहिल्यांदा एवढी मोठी खेळी खेळण्याची संधी मिळाली. या खेळपट्टीवर धावांचा पाठलाग करणे सोपे नव्हते, कारण खेळपट्टी संथ होत चालली होती आणि चेंडू बॅटवर सहजपणे येत नव्हता. पण स्थिरस्थावर झाल्यावर आम्ही फटकेबाजी केली आणि सामना जिंकलो.- महेंद्रसिंग धोनी, भारताचा कर्णधारआम्ही चांगले क्रिकेट खेळलो. आमच्याकडून सुटलेले झेल महागात पडले. अखेरच्या षटकांमध्ये आम्ही चांगली गोलंदाजी करू शकलो नाही, हे दोन्ही अपवाद वगळले तर आम्ही दमदार कामगिरी केली. विश्वचषकाचा शेवट चांगला न झाल्याचे दु:ख आहे.ब्रेंडन टेलर, झिम्बाब्वेचा कर्णधारअथक मेहनतीला अखेर फळ आले. जेव्हा संघाला माझी गरज असते तेव्हा मी सर्वोत्तम कामगिरी करण्याचा प्रयत्न करतो. धोनीने सामन्यादरम्यान संवाद साधल्याचा मला फायदा झाला. आम्ही दोघे बऱ्याच सामन्यांमध्ये एकत्र खेळलो आहोत आणि काही सामन्यांमध्ये विजयावर एकत्रितपणे शिक्कामोर्तबही केले आहे. हे शतक मला बरेच काही देऊन गेले आहे.सुरेश रैना, भारताचा फलंदाजअव्वल फलंदाज१. कुमार संगकारा (श्रीलंका) ४९६ धावा२. बेंड्रल टेलर (झिम्बाब्वे) ४३३ धावा३. ए बी डी’व्हिलियर्स (दक्षिण आफ्रिका) ४१७ धावाअव्वल गोलंदाज१. मिचेल स्टार्क (ऑस्ट्रेलिया) १६ बळी२. जोश डॅव्हे, ट्रेंट बोल्ट, मोहम्मद शमी १५ बळी३. डॅनियल व्हेटोरी, टिम साऊदी, मॉर्ने मॉर्केल १३ बळी
