व्हॉट्सअॅपने सुरू केलेले नवे स्टेटस त्यांनी केवळ दोनच दिवसात बंद करण्याच्या विचारात आहे. पुन्हा जुनेच व्हॉट्सअॅप स्टेटस हे फीचर परत येण्याची शक्यता आहे. यावेळी मात्र या फीचरचे नाव 'स्टेटस' असे न राहता टॅगलाइन असे राहणार आहे, अशी माहिती डब्ल्यूएबिटाइन्फो या अकाउंटवर देण्यात आली आहे. गुरुवारी व्हॉट्सअॅपने नवे फीचर लाँच केले. या फीचरमध्ये आपल्याला टेक्स्ट ऐवजी फोटो किंवा व्हिडिओ असे स्टेटस ठेवता येऊ शकत होते. या फीचरवर अनेक नकारात्मक प्रतिक्रिया आल्या. व्हॉट्सअॅपने स्नॅपचॅट आणि इन्स्टाग्रामची नक्कल केल्याची टीका देखील काही जणांनी केली होती. त्यामुळे व्हॉट्सअॅपने जुने स्टेटस जुने परत आणण्याचा विचार केला असल्याचे म्हटले जात आहे. जुन्या स्टेटसमुळे तुम्ही बिजी आहात किंवा उपलब्ध आहात, याची माहिती मिळत असे परंतु नव्या स्टेटसमुळे हे बंद झाले होते. तसेच व्हॉट्सअॅप काँटॅक्ट लिस्ट एका ठिकाणीच पाहायला मिळत असे परंतु हे फीचर बंद करण्यात आले होते. त्या जागी व्हिडिओ आणि फोटो हे फीचर आले. ते लोकांना आवडले नाही. या फीचरमुळे तुमचे व्हॉट्सअॅप हे स्नॅपचॅट सारखे झाले आहे असे ग्राहक म्हणू लागले. ग्राहकांनी सोशल मिडिया प्लॅटफॉर्मवर या नव्या फीचरबाबत नाराजी व्यक्त केली होती. ट्विटर अकाउंट डब्लूएबीटाइन्फोवर या अकाउंटवर ही माहिती देण्यात आली आहे. व्हॉट्सअॅपच्या अनेक बातम्या सर्वात आधी या अकाउंटवर लीक केल्या जातात. गेल्या दोन दिवसांपासून व्हॉट्सअॅप स्टेटस हे फीचर बदलल्यापासून सोशल मिडियावर त्याचीच चर्चा होती. इतकेच नव्हे तर सोशल मिडियावर या फीचरची खिल्ली देखील उडवली जाऊ लागली होती.
