औरंगाबाद महानगरपालिकेच्या स्थायी समितीमध्ये शिवसेनेच्या ऋषीकेश खैरे आणि सिद्धांत शिरसाट यांची निवड करण्यात आली. यापैकी ऋषीकेश खैरे हे शिवसेना खासदार चंद्रकांत खैरे तर सिद्धांत शिरसाट हे शिवसेना आमदार संजय शिरसाट यांचे पूत्र आहेत. औरंगाबाद महानगरपालिकेचे स्थायी समितीचे आठ सदस्य निवृत्त झाले. त्यांच्याजागी नवीन सदस्यांची निवड करण्यात आली. यामध्ये शिवसेनेकडून ऋषिकेश खैरे आणि सिद्धांत शिरसाट यांना संधी देण्यात आली. मुलांच्या राजकीय वाटचालीसाठी वडिलांकडून वजन वापरण्यात आल्यामुळे खासदार आमदार पुत्रांची वर्णी लागल्याचं बोलले जात आहे. ऋषीकेश खैरे हे महापालिकेच्या समर्थनगर प्रभाग क्रमांक ६८ मधून निवडून आलेले आहेत. तर बन्सीलाल नगर प्रभाग क्रमांक १०४ मधून सिद्धांत शिरसाट पालिकेवर निवडून आलेले आहेत. स्थायी समितीच्या निवृत्त झालेल्या आठ जणांमध्ये शिवसेनेच्या पाच, भाजपचा एक आणि एमआयएमच्या दोन सदस्यांचा समावेश आहे. शिवसेनेकडून ऋषीकेश खैरे, सिद्धांत शिरसाट, स्वाती नांगरे, रूपचंद वाघमारे यांची तर भाजपकडून राखी देसरडा आणि शहर विकास आघाडीकडून गजानन बरवाल यांची नियुक्ती करण्यात आली आहे. 'एमआयएम'च्या वतीने सय्यद मतीन रशीद, नर्गिज सलिम यांची स्थायी समितीवर वर्णी लागली आहे. याशिवाय, शहर विकास आघाडीकडून गजानन बरवाल यांना स्थायी समितीच्या सदस्यपदाची संधी देण्यात आली. शिवसेना-भाजप युतीच्या सूत्रानुसार स्थायी समितीचे सभापतीपद भाजपकडे आहे. भाजपकडून गजानन बारवाल यांची स्थायी समितीच्या सभापतीपदी निवड होण्याची दाट शक्यता आहे. स्थायी समितीच्या निवडीनंतर आज समितीचे मावळते सभापती मोहन मोगवले यांनी पालिकेचा अर्थसंकल्प सादर केला. मात्र, या अर्थसंकल्प सभेला नवनिर्वाचित स्थायी समिती सदस्य ऋषिकेश खैरे आणि सिद्धांत शिरसाट यांनी दांडी मारली होती.
