आपण आज काय खाल्लं, काय मजा केली, कुठलं नवीन ठिकाण पाहिलं, कुठे फिरण्यासाठी गेलो होतो वगैरे वगैरेबाबत सतत आपल्या वर्तुळातील मित्रांना, आप्तेष्टांना ‘अपडेट्स’ देत राहणं हा व्हॉट्सअॅपरूपी सोशल मीडियातील ‘ट्रेण्ड’. अगदी एखाद्याने गमतीने स्वत:चे छायाचित्र व्हॉट्सअॅपवर टाकून त्याखाली ठळक अक्षरात ‘कैलासवासी अमूक अमूक,’ असे लिहिले तरी मित्र ती भंकसच समजतात. मात्र, असा प्रकार खरोखरच घडला तर तो नक्कीच धक्कादायक असतो. सांगली जिल्ह्य़ातील वाळवा या गावात हा प्रकार घडला. महादेव कुंभार (२२) या तरुणाने स्वत:चे छायाचित्र काढून श्रद्धांजली वाहणारा मजकूर व्हॉट्सअॅपवर टाकला आणि नंतर त्याने खरोखरच आपल्या आयुष्याचा शेवट करून घेतला.गावोगाव भटकून मोलमजुरी करत पोटाची खळगी भरणाऱ्या कुंभार कुटुंबात वाढलेला महादेव कारखान्यात कंत्राटी काम करून महाविद्यालयीन शिक्षण घेत होता. महादेवने रविवारी व्हॉट्सअॅपवर स्वतचे छायाचित्र टाकून त्याखाली ‘कै. महादेव कुंभार यांना भावपूर्ण श्रद्धांजली’ असा मजकूर टाकून आपल्या वर्तुळातील मित्रांना मोबाइलवर पाठवला. महादेवच्या मित्रांनी हा संदेश तितक्याशा गांभीर्याने घेतला नाही. सोमवारी आई-वडील कामाला गेल्यानंतर महादेवने गळफास लावून घेत आत्महत्या केली. महादेवच्या मृत्यूची बातमी ऐकून मित्रांना धक्काच बसला. त्याच्या आत्महत्येचे कारण मात्र अजूनही स्पष्ट झालेले नाही.