कर्जबुडव्यांनो, तुमच्यावर करडी नजर आहे – जेटली

तुम्ही मुक्तपणे जगभ्रमंती करत आहात याचा अर्थ तुमच्याकडे कोणाचे लक्ष नाही, असा मुळीच होत नाही; भारतीय यंत्रणेला तुम्ही गुंगारा दिला तर कठोर कारवाई करण्यात येईल, असा इशारा केंद्रीय अर्थमंत्री अरुण जेटली यांनी बँकांच्या निर्ढावलेल्या कर्जबुडव्यांना उद्देशून दिला.

गुरुवारी मुंबईत आयोजित बँकिंग उद्योगातील निपुणतेच्या गौरवाचा वार्षिक उपक्रम असलेल्या ‘एफई बेस्ट बँक्स पुरस्कार’ सोहळ्यात प्रमुख पाहुणे म्हणून ते बोलत होते.

‘किंगफिशर एअरलाईन्स’चे विजय मल्या यांचे नाव न घेता जेटली म्हणाले की, बँकांची देणी न फेडता सर्वत्र खुशाल हिंडता येईल, तुमच्याकडे कोणाचे लक्ष नाही, असा जर कुणाचा समज असेल तर तो त्यांचा भ्रम आहे. थकीत कर्जे असलेल्या पोलाद तसेच बांधकामसारख्या क्षेत्रांवरील कारवाई यापूर्वीच सुरू झाली आहे. कर्जबुडय़ांकडून वसुली होण्यासाठी बँकांना सरकार सर्वतोपरी सहकार्य केले जाईल, अशी ग्वाहीही त्यांनी यावेळी दिली.

बँकांच्या थकित कर्जाचा भार घेणाऱ्या मालमत्ता निधीची स्थापना करावी किंवा नाही याबाबतचा निर्णय राष्ट्रीय गुंतवणूक व पायाभूत निधीच्या प्रमुखपदाचा कार्यभार सप्टेंबरच्या पहिल्या आठवडय़ात घेणारी व्यक्ती घेईल, असे जेटली यांनी सांगितले. जेटली यांच्या हस्ते यावेळी उत्कृष्ट बँकांना पुरस्कार प्रदान करण्यात आले.

‘एक्स्प्रेस वृत्तपत्र समूहा’चे अध्यक्ष विवेक गोएंका म्हणाले, ‘एफई बेस्ट बँक्स पुरस्कार’ बँकिंग क्षेत्रातील उत्कृष्टतेचा एक मानदंड ठरलेला न चुकविता येणारा गौरव सोहळा आहे.