नवी दिल्ली : आता सामान्य विमा कंपन्यांना ‘कॅशलेस’ उपचारांसाठी रुग्णालयाच्या निवडीचे आणि भर घालण्याचे स्वातंत्र्य भारतीय विमा नियामक आणि विकास प्राधिकरणाने अर्थात ‘इर्डा’ने बहाल केले आहे. विमा कंपन्यांच्या संचालक मंडळाने आखलेल्या निकष आणि मानदंडांची पूर्तता करणाऱ्या रुग्णालय अथवा रुग्णालयांच्या जाळय़ांच्या प्रदात्यांची निवड यातून केली जाऊ शकेल.
रुग्णालयात उपचार सुरू असताना कोणतेही देयके चुकती करावी न लागता, आरोग्य विम्याच्या कवचातून त्याची भरपाई केली जाण्याच्या पद्धती अर्थात ‘कॅशलेस उपचारां’च्या पद्धतीची व्याप्ती आणि विस्तार देशात सर्वत्र आणि विशेषत: बडी शहरे व महानगरांबाहेर सर्वदूर व्हावा, या उद्देशाने हे पाऊल टाकल्याचे ‘इर्डा’ने स्पष्ट केले. विमा कंपन्यांच्या संचालक मंडळाने या सुविधेसाठी रुग्णालयाच्या निवडीबाबत निकष ठरविताना, रुग्णालयातील आरोग्यनिगेच्या सोयीसुविधा आणि किमान मनुष्यबळ प्राधान्याने पाहावे, असे ‘इर्डा’ने यासंबंधीच्या परिपत्रकाद्वारे सुचविले आहे.
शहरी भागात कॅशलेस रुग्णालयांचे मोठे जाळे असते, मात्र ‘इर्डा’ने टाकलेल्या या स्वागतार्ह पावलामुळे विमा कंपन्यांना ग्रामीण भागातही अशी सेवा विस्तारण्यास प्रवृत्त केले जाईल आणि यामुळे ग्रामीण विमाधारकांवरील रुग्णालयीन उपचारांचा आर्थिक भार मोठय़ा प्रमाणात कमी होईल, असा विश्वास लिबर्टी जनरल इन्शुरन्सचे दावे विभागाचे अध्यक्ष राहुल शर्मा यांनी व्यक्त केला.
कॅशलेस सुविधा काय?
या सुविधेचे वैशिष्टय़ म्हणजे विमाधारकाला रुग्णालयातील उपचारांसाठी देयक भरण्याची चिंता न करता कोणत्याही अधिसूचित रुग्णालयात उपचार घेता येऊ शकतात. विमाधारकाच्या आरोग्य विमा पॉलिसीनुसार वैद्यकीय उपचार खर्चाची पूर्तता विमा कंपनीकडून केली जाईल. या सोयीमुळे आरोग्य विम्यांतर्गत ‘कॅशलेस’ प्रक्रिया अनेकांगाने सर्वोत्तम पर्याय ठरतो, कारण विमाधारकाला उपचार खर्चासाठी मोठय़ा रकमेच्या तरतुदीसाठी ऐनवेळी धावपळ करण्याची गरज राहात नाही.
