BMC election 2017: मनसे-शिवसेनेत ‘सेटलमेंट’; आशिष शेलार यांचा गंभीर आरोप

‘लोकसत्ता ऑनलाईन’ने आज, मंगळवारी आयोजित केलेल्या ‘फेसबुक लाईव्ह चॅट’मध्ये भाजपचे मुंबई अध्यक्ष आशिष शेलार यांनी जनतेशी संवाद साधला. जनतेने विचारलेल्या विविध प्रश्नांना त्यांनी मनमोकळेपणाने उत्तरे दिली. महापालिका निवडणूक, शिवसेना-भाजपमधील तुटलेली युती, शिवसेनेने केलेली टीका, राज्यातील देवेंद्र फडणवीस यांच्या नेतृत्वाखालील सरकारने दिलेली आश्वासने, काँग्रेस-राष्ट्रवादी काँग्रेसची भूमिका, पारदर्शक कारभाराचे आश्वासन, स्टॅम्प पेपरवरील भाजपचा जाहीरनामा, शिवसेना पक्षप्रमुख उद्धव ठाकरे यांनी केलेली टीका, मुंबईचा विकास, भाजपची भूमिका आदी मुद्द्यांवर जनतेने त्यांना प्रश्न विचारले. यावेळी आशिष शेलार यांनी शिवसेना आणि पक्षप्रमुख उद्धव ठाकरे यांच्यावर टीका केली. मुंबईत भाजप क्रमांक एकचा पक्ष आहे. मुंबईकर भाजपलाच कौल देईल, असा विश्वासही त्यांनी व्यक्त केला. काँग्रेस पक्ष मनाने हरला आहे. त्यामुळे काँग्रेसने शिवसेनेसोबत छुपी युती केल्याचे दिसते आहे, अशी टीकाही त्यांनी केली.

काँग्रेस, राष्ट्रवादी काँग्रेसलाही त्यांनी लक्ष्य केले. काँग्रेस आणि राष्ट्रवादी काँग्रेस हे दोन्ही पक्ष भ्रष्टाचाराच्या कारभारात बुडालेले आहेत. त्यांच्याकडे जनता पाहिल असे वाटत नाही. काँग्रेस हा मनानेच हरलेला पक्ष आहे. त्यामुळेच त्यांनी शिवसेनेशी छुपी युती केलेली आहे. तर मनसेने युती तुटल्यानंतर शिवसेनेला पहिली ‘टाळी’ दिली. पण आता तर त्यांनी शिवसेनेसोबत सेटलमेंट केली आहे की काय, अशी शंका येऊ लागली आहे, असा आरोप शेलार यांनी केला. भाजपमध्ये पक्षाचे काम करणाऱ्या कार्यकर्त्यालाच तिकीट दिले गेले आहे, असे सांगून त्यांनी तिकीटवाटपात घराणेशाही दिसून आल्याच्या विरोधकांच्या आरोपांचे खंडन केले. शिवसेना, मनसे हे एकाच कुटुंबाचे आहेत. काँग्रेस – राष्ट्रवादी हे एकाच परिवराचे ऐकतात. शिवसेना, मनसेला वाटतेय त्यांनाच उमेदवारी दिली जात आहे. त्यांच्या नेत्यांच्या नातेवाईकांनाच अनेक ठिकाणी तिकीटे दिली गेली आहेत, असेही शेलार यांनी सांगितले.

ठळक मुद्दे:

– भाजपने मुंबईत प्रचारात आघाडी घेतली आहे.

– मुंबईकरांना सोबत घेऊनच भाजपने जाहीरनामा प्रकाशित केला आहे. हा मुंबईकरांचा जाहीरनामा आहे.

– भाजपने सुशिक्षित उमेदवारांना संधी दिली आहे.

– भाजपच क्रमांक एकचा पक्ष आहे. मुंबई महापालिकेत पूर्ण बहुमत मिळणार

– शिवसेनेला केंद्राने जाहीर केलेला पारदर्शक अहवाल कळलाच नाही.

– विकासकामे आणि कंत्राटदार यांच्याबद्दल पारदर्शक माहिती मिळते का?

– पारदर्शक ही भाजपने राज्यभरासाठी मांडलेली संकल्पना

– पारदर्शक हा मुद्दा जनहिताचा, त्याचा आग्रह धरणारच

– मुंबईचा संपूर्ण विकास भाजपच करीन

– काँग्रेस-राष्ट्रवादी सरकारने भ्रष्टाचाऱ्यांना पाठिशी घातले

– पुण्यात भाजप दोन अंकी आकडा गाठणार, पुण्यात भाजपचा महापौर बसेल

– मुंबईत शिवसेनेच्या एकतर्फी कारभारामुळे भ्रष्टाचार बोकाळला

– भाजपला सोबत घेतले असते तर कदाचित शिवसेनेवर खाली मान घालण्याची वेळ आली नसती

– शिवसेना-भाजपच्या युतीत अनिल परब यांनी खोडा घातला

– भाजपने आरोपपत्र दाखल झालेल्यांना उमेदवारी दिलेली नाही

– शिवसेना पक्ष प्रमुख उद्धव ठाकरे यांना महापालिका आकारत असलेल्या करांबाबत माहिती नाही

– शिवसेनेने टॅक्स टेररिझम करून मुंबईकरांना लुटले

– गेल्या १५ वर्षांत मुंबईच्या माहितीविषयीचे संग्रहालय झाले नाही. हे शिवसेनेचे पाप

– मूळ मुंबईकर आणि मराठी माणसांसाठी परवडणारी घरे बांधणार

– १५ वर्षांत काँग्रेस-राष्ट्रवादीला जमले नाही, ते देवेंद्र फडणवीस सरकारने करून दाखवले

– भाजपने पक्षाचे कार्यकर्ते असलेल्या १९२ जणांना उमेदवारी दिली. बाहेरून आलेल्या केवळ सहा जणांनाच उमेदवारी दिली आहे.

– काँग्रेस – शिवसेनेत मॅचफिक्सिंग

– भाजपला बंडखोरीचा फटका बसणार नाही. शिवसेना आणि काँग्रेसलाच बंडखोरीचा सर्वाधिक फटका बसेल

– गैरप्रचार हा शिवसेनेचा मूळ आत्मा

– भाजप कायद्याने चालणारा पक्ष आहे. भ्रष्टाचाऱ्यांना शिक्षा झालीच पाहिजे ही भूमिका

– अजित पवार, सुनील तटकरे यांच्यावर चौकशीनंतर कायदेशीर कारवाई होणार

– महाड पूलाचे काम येत्या काही दिवसांत पूर्ण होईल

– निवडणुकांनंतर भाजप खर्च झालेल्या पैशांचा हिशेब देणार

– मोदी येथे आले नाहीत, पण मोदींचे नावच पुरेसे

– मोदींच्या नावानेच अनेकांचा थरकाप उडतो. त्यांना ग्लुकॉन-डी घ्यावी लागते.

– बाळासाहेबांचा अपमान करण्याचा प्रयत्न अहंकारी नेतृत्वाकडून केला जात आहे.

– मुंबईकरांना मूलभूत सुविधा पुरवण्यात शिवसेना शत-प्रतिशत अपयशी

– भाजप मुंबईत येत्या पाच वर्षांत बदल घडवून दाखवेल

– मुख्यमंत्री नागपूरमधील असल्याने शहराला बदनाम करण्याचा विरोधकांचा डाव

– राष्ट्रवादीच्या पाठिंब्याचा प्रश्नच येत नाही. भाजप सरकार पाच वर्षे पूर्ण करीन

– भाजपने स्टॅम्प पेपरवर लिहून दिलेल्या जाहीरनाम्यातील कामे पाच वर्षांत पूर्ण करणारच

– भाजपच्या मंत्र्यांवर केलेला एकही आरोप सिद्ध झालेला नाही. एकनाथ खडसेंवरील आरोपांबाबत चौकशीनंतर समोर येईल, पण निर्दोष सुटतील यात शंका नाही

– टोलमुक्तीचे काम ८० टक्के पूर्ण झाले आहे. येत्या पाच वर्षांत टोलमुक्त महाराष्ट्र करू

– मुंबईला स्मार्ट करण्याची भाजपची भूमिका

– शिवसेना आणि काँग्रेसने मुंबईतील मराठी माणसाला बाहेर काढण्याचे काम केले

– सर्वाधिक घराणेशाही शिवसेनेमध्ये आहे

– शिवसेना- काँग्रेसची छुपी युती

– काँग्रेस-राष्ट्रवादी काँग्रेस भ्रष्टाचारात बुडालेले आहेत

– मनसेची शिवसेनेसोबत सेटलमेंट आहे.