‘जिओफिन’ १ सप्टेंबरपासून ‘सेन्सेक्स’मधून बाहेर

‘जिओफिन’चा समभाग बाजार पदार्पणापासून सलग चार सत्रात एकंदर २० टक्क्यांनी घसरला. परिणामी बीएसई निर्देशांकांतून वगळण्याची मुदत आणखी तीन दिवसांनी म्हणजेच ३१ ऑगस्टपर्यंत वाढवण्यात आली आहे. भांडवली बाजाराच्या दोन्ही मुख्य निर्देशांकाचा भाग असलेल्या रिलायन्स इंडस्ट्रीजचाच ‘जिओफिन’ हा विभक्त घटक आहे. त्यामुळे सूचिबद्धतेनंतर ‘जिओफिन’चा समभाग हा सेन्सेक्स आणि निफ्टी निर्देशांकातील अनुक्रमे ३१ वा आणि ५१ वा समभाग म्हणून समाविष्ट केला गेला होता. रिलायन्सचा समभाग पोर्टफोलियोमध्ये धारण करणाऱ्या ‘पॅसिव्ह फंडा’वर या घडामोडीचा कोणताही परिणाम होऊ नये असा यामागे हेतू होता. तथापि ही तात्पुरती सोय करण्यात आली होती.

आणखी वाचा-रिलायन्स रिटेलमधील आणखी १० टक्के हिस्साविक्री शक्य

‘जिओफिन’चा समभाग पदार्पण दिनापासून पुढील दहा सत्रात त्याचे ‘टी’ श्रेणीमध्ये वर्गीकरण करण्यात आले आहे. परिणामी संस्थात्मक गुंतवणूकदारांकडून झालेल्या समभाग विक्री माऱ्यामुळे सलग चार सत्रात कमाल मर्यादेपर्यंत घसरला होता.

अखेर समभागात खरेदी

‘जिओफिन’चा समभाग सलग चार सत्रातील कमाल घसरणीनंतर शुक्रवारच्या सत्रात खरेदीदारही लाभल्याने दिवसअखेरीस सकारात्मक पातळीवर स्थिरावला. ०.४९ टक्क्यांच्या वाढीसह समभाग २१४.५० रुपयांवर बंद झाला. दिवसभरातील सत्रात त्याने २२४.१० रुपयांची सत्रातील उच्चांकी पातळी गाठली होती. सध्याच्या समभागाच्या बाजारभावानुसार, कंपनीचे बाजारभांडवल १,३६,२७७ कोटी रुपयांचे आहे.