Bharat Brand: ‘भारत ब्रँडच्या वस्तू आता रिलायन्स रिटेलमध्ये विकल्या जाणार’, केंद्र सरकार निर्णय घेण्याच्या तयारीत

भारत ब्रँडकडून पिठ, तांदूळ आणि डाळींची रास्त दरात विक्री केली जाते. याआधी रिलायन्स जिओ मार्ट, ॲमेझॉन आणि बिगबास्केट अशा ई-कॉमर्स साईटवर थोड्या कालावधीसाठी भारत ब्रँडची विक्री केली होती. मात्र आता रिलायन्स रिटेलशी दीर्घ कालावधीसाठी करार करण्यात आला आहे. केंद्र सरकारकडे असलेल्या राखीव साठ्याला अनुदानित दरात रिलायन्स रिटेलमध्ये विक्रीसाठी ठेवण्यात येणार आहे. रिलायन्सशिवाय डीमार्ट आणि इतर सुपर मार्केट स्टोअरशीही चर्चा केली जाणार असल्याची माहिती सूत्रांनी इकॉनॉमिक टाइम्सने दिली आहे.

या विषयावर रिलायन्स रिटेलची बाजू जाणून घेण्याचा प्रयत्न इकॉनॉमिक टाइम्सने केला, मात्र त्यांना याबाबत रिलायन्सची प्रतिक्रिया मिळू शकली नाही.

२०२३ साली केंद्र सरकारने भारत आटा, भारत डाळ आणि भारत तांदूळ ही उत्पादने किरकोळ बाजारात आणले होते. दारिद्ररेषेखाली नसल्यामुळे ज्या लोकांना प्रधानमंत्री गरीब कल्याण अन्न योजनेचा लाभ मिळत नाही, असा लोकांना रास्त दरात अन्नधान्य मिळवून देण्यासाठी भारत ब्रँड सुरू करण्यात आला होता.