Sensex on all time High : भारतीय शेअर बाजाराने रचला नवा इतिहास; सेन्सेक्स आतापर्यंतच्या सर्वकालीन उच्चांकावर

सात महिन्यांच्या कालावधीनंतर सेन्सेक्सने हा टप्पा गाठला

बीएसईचा ३० शेअर्सचा सेन्सेक्स सुरुवातीच्या व्यवहारात १४६ अंकांनी वाढून ६३,४७३.७० वर पोहोचला. NSE निफ्टी ३७ अंकांनी वाढून १८,८५३.७० वर पोहोचला. बाजार उघडल्यानंतर काही वेळातच मुंबई शेअर बाजाराच्या सेन्सेक्सने २६०.६१ अंकांनी उसळी मारली आणि ६३,५८८.३१ च्या सर्वकालीन उच्चांक गाठला. सुमारे सात महिन्यांच्या कालावधीनंतर सेन्सेक्सने हा टप्पा गाठला आहे. गेल्या वर्षी १ डिसेंबर रोजी सेन्सेक्सने ६३,५८३.०७ च्या इंट्रा डेला विक्रमी शिखराला स्पर्श केला होता.

हेही वाचाः अनिल अंबानींवर आणखी एक संकट; आता ‘ही’ कंपनी बंद होण्याची शक्यता

टेस्लाचेही भारतात येण्याचे संकेत

मुकेश अंबानींच्या रिलायन्स इंडस्ट्रीज, टीसीएस, एचडीएफसीसारखे शेअर्स बुधवारच्या व्यवसायात रॉकेटच्या वेगाने धावत आहेत. दुसरीकडे श्रीराम फायनान्स, पिरामल एंटरप्रायझेस यांसारख्या समभागांमध्ये १० टक्क्यांचे अप्पर सर्किट दिसले. किंबहुना बाजारातील गुंतवणूकदारांचा विश्वासही वाढत आहे, कारण पीएम मोदी अमेरिकेच्या दौऱ्यावर गेल्यापासून भारतासाठी चांगली बातमी येऊ लागल्याचं तज्ज्ञ सांगतात. एकीकडे टेस्लाने भारतात येण्याचे संकेत दिले आहेत. त्यामुळे सेमीकंडक्टर क्षेत्रातही भारताला चांगली बातमी मिळाली आहे.

हेही वाचाः ५ अन् १० नव्हे तर जुलैमध्ये ‘इतके’ दिवस बँका राहणार बंद; पाहा संपूर्ण यादी

बाजाराचा कल आगामी काळात सकारात्मक राहण्याची शक्यता

भारतासाठी वाढीची चिन्हे अधिक चांगली असल्याचे बाजारातील तज्ज्ञांचे मत आहे. अशा स्थितीत आगामी काळातही बाजार सकारात्मक राहील, अशी अपेक्षा आहे. बुधवारच्या व्यवहारातील क्षेत्रीय निर्देशांकाबद्दल बोलायचे झाल्यास निफ्टी ऑटोमध्ये ०.६१ टक्क्यांची वाढ दिसून येत आहे. दुसरीकडे वित्तीय सेवांमध्ये ०.५१ टक्के वाढ नोंदवली गेली आहे. येथून बाजार आणखी वाढणार आहे, असा विश्वास आहे. खरे तर अनेक राज्यांतील निवडणुका आणि त्यानंतर लोकसभा निवडणुकीसारख्या मोठ्या घटनांमुळे बाजाराचा कल आगामी काळात सकारात्मक राहू शकतो.