वैद्यकीय पदवीसाठी नीट तयारी

आवश्यक शैक्षणिक पात्रता- अर्जदार विद्यार्थ्यांनी १२ वीची परीक्षा भौतिकशास्त्र, रसायनशास्त्र, जीवशास्त्र अथवा बायोटेक्नॉलॉजी या विषयांसह कमीतकमी ५०% गुणांसह उत्तीर्ण केलेली असावी. गुणांच्या टक्केवारीची अट राखीव वर्गगटातील उमेदवारांसाठी सरकारी नियमांनुसार ४५% पर्यंत शिथिलक्षम आहे.

विशेष सूचना- जे विद्यार्थी वरील विषयांसह २०१७ मार्चमध्ये बारावीची परीक्षा देणार असतील तेसुद्धा वरील प्रवेश पात्रता परीक्षा देण्यासाठी पात्र आहेत.

वयोगट- अर्जदार विद्यार्थी खुल्या वर्गगटातील असल्यास त्यांचा जन्म ८.५.१९९२ ते १.१.२००१ च्या दरम्यान व ते राखीव वर्गगटातील असल्यास त्यांचा जन्म ८.५.१९८७ ते १.१.२००१ च्या दरम्यान झालेला असावा.

निवड प्रक्रिया- अर्जदारांपैकी पात्रताधारक विद्यार्थ्यांना राष्ट्रीय स्तरावर घेण्यात येणारी नॅशनल एलिजिबिलिटी कम एन्ट्रन्स टेस्ट २०१७ ही प्रवेश परीक्षा द्यावी लागेल. ही परीक्षा ७ मे २०१७ रोजी होईल. वरील प्रवेश पात्रता परीक्षा विश्लेषणपर पद्धतीवर व १८० प्रश्नांची असेल. परीक्षेचा कालावधी निर्धारित तारखेला सकाळी १० ते १ अशा तीन तासांचा असेल. प्रवेश पात्रता परीक्षेतील गुणांच्या टक्केवारीच्या आधारे संबंधित महाविद्यालयात विद्यार्थ्यांना वैद्यक विज्ञान विषयातील एमबीबीएस/ बीडीएस या पदवी अभ्यासक्रमांच्या पहिल्या वर्षांला प्रवेश देण्यात येईल.

विशेष सूचना- वरील नॅशनल एलिजिबिलिटी कम एन्ट्रन्स टेस्ट या प्रवेश पात्रता परीक्षेसाठी संबंधित विद्यार्थ्यांना जास्तीतजास्त तीन संधी उपलब्ध होतील.

अर्जासह भरावयाचे शुल्क- अर्जदार सर्वसाधारण गटातील असल्यास त्यांनी १४०० रु. (राखीव वर्गगटातील उमेदवारांसाठी ७५० रु.) शुल्क म्हणून संगणकीय पद्धतीने भरणे आवश्यक  आहे.

अधिक माहिती व तपशील- वरील प्रवेश पात्रता परीक्षेच्या संदर्भात अधिक माहिती व तपशिलासाठी केंद्रीय माध्यमिक शिक्षण मंडळ, नवी दिल्लीच्या दूरध्वनी क्र. ०११- २२०४१८०७ अथवा ०११-२२०४१८०८ या दूरध्वनी क्रमांकावर संपर्क साधावा अथवा केंद्रीय माध्यमिक शिक्षण मंडळाच्या http://www.cbseneet.nic.in  या संकेतस्थळाला भेट द्यावी.

अर्ज करण्याची पद्धत व शेवटची तारीख- संगणकीय पद्धतीने वरील संकेतस्थळावर प्रवेश अर्ज करण्याची शेवटची तारीख १ मार्च २०१७.

बारावी उत्तीर्ण अशा ज्या पात्रताधारक विद्यार्थ्यांना वैद्यकशास्त्र क्षेत्रातील एमबीबीएस/ बीडीएस या अभ्यासक्रमांमध्ये प्रवेश घ्यायचा असेल अशांनी केंद्रीय माध्यमिक शिक्षण मंडळाच्या नॅशनल एलिजिबिलिटी कम एन्ट्रन्स टेस्ट (यूजी) २०१७ या प्रवेश पात्रता परीक्षेचा लाभ घ्यावा.