पत्नीने पाणी दिलं नाही म्हणून संतापाच्या भरात पतीने आपल्याच आठ महिन्याच्या मुलाची हत्या केली. लखनऊच्या निगोहा भागात मंगळवारी रात्री ही धक्कादायक घटना घडली. आरोपीला पोलिसांनी अटक केली आहे. पाणी न देण्यावरुन पती-पत्नीमध्ये जोरदार भांडण झालं. संतापाच्या भरात पतीने आपल्याच मुलाची हत्या केली. निगोहा पोलिसांनी आरोपी सुरेंद्र साहूला (३०) अटक केली आहे. सुरेंद्र साहू संतप्त स्वभावाचा आहे. रात्री १० च्या सुमारास तो घरी आला. मी दरवाजा उघडून आतमध्ये काही काम करण्यासाठी गेली. मी त्याला पाणी न देता आतमध्ये निघून गेली म्हणून त्याने मला बडबडण्यास सुरुवात केली असे लक्ष्मीने सांगितले. रागाच्या भरात त्याने कॉटवर झोपलेल्या आठ महिन्यांच्या मुलाला उचलले व भिंतीवर फेकले. भिंतीला आपटून खाली पडल्यानंतर मूल रडत होते. त्या आवाजाने साहू आणखी संतापला. त्याने पुन्हा मुलाला उचलले व जमिनीवर आपटले. मी त्याला थांबवण्याचा प्रयत्न केला. पाय पकडून गयावया करत होते पण तो ऐकला नाही असे साहूची पत्नी लक्ष्मीने पोलिसांना सांगितले. मुलाची हत्या केल्यानंतर साहू फरार झाला. लक्ष्मीने मुलाला उठवण्याचा प्रयत्न केला. तिने शेजाऱ्यांना बोलावले. ते मुलाला घेऊन हॉस्पिटलमध्ये गेले. पण डॉक्टरांनी मृत घोषित केले. दोन तासात पोलिसांनी आरोपीला अटक केली.
