News Flash

मृत्यूचं तांडव सुरुच! सर्वाधिक करोना मृत्यूंच्या यादीत भारत जगात तिसऱ्या स्थानी

२४ तासांत साडेतीन हजार करोनाबळी

श्वास घेण्यास त्रास होत असल्याने करोना रुग्णाला ऑक्सिजन दिला जात आहे. (छायाचित्र। रॉयटर्स)

करोनाच्या दुसऱ्या लाटेनं देशात हाहाकार माजवला आहे. दररोज लाखोंच्या संख्येनं करोनाबाधित आढळून येत असून, गेल्या काही आठवड्यांपासून करोना रुग्णांच्या मृत्यूचं प्रमाणही चिंता वाटावी इतकं वाढलं आहे. गेल्या काही दिवसांपासून देशात दररोज साडेतीन हजारांच्या आसपास रुग्णांवर करोना, ऑक्सिजनअभावी वा बेड न मिळाल्याने मृत्यू ओढवत आहे. मृत्यूचं हे थैमान सुरूच असल्याचं गेल्या २४ तासांतील आकडेवारीतून स्पष्ट होताना दिसत आहे. भारतातील एकूण करोना मृतांची संख्या सव्वादोन लाखांच्या उंबरठ्यावर जाऊन पोहोचली आहे. तर करोना मृत्यूंच्या यादीत जगात भारत तिसऱ्या स्थानावर पोहोचला आहे.

केंद्रीय आरोग्य मंत्रालयाने मागील २४ तासांतील आकडेवारी जाहीर केली आहे. आरोग्य मंत्रालयाने प्रसिद्ध केलेली आकडेवारी काहीसा दिलासा देणारी असली, तरी मृत्यूंच्या बाबतीत चिंता कायम आहे. देशातील करोना रुग्णवाढ मंदावली असल्याचं दिसत आहे. गेल्या २४ तासांत देशात तीन लाख ५७ हजार २२९ नवीन करोनाबाधित रुग्ण आढळून आले आहेत. तर याच कालावधीत ३ लाख २० हजार २८९ रुग्ण करोनातून बरे होऊन घरी परतले आहेत. म्हणजे नवीन रुग्ण आणि घरी परतलेले रुग्ण ही संख्या दिलासा देणारी आहे. मात्र, देशात दररोज होणाऱ्या मृत्यूंच्या संख्येत कोणतीही घट झाली नसल्याचं दिसत आहे.

देशात गेल्या २४ तासांत ३ हजार ४४९ रुग्णांचा मृत्यू झाला आहे. त्यामुळे देशातील एकूण करोनाबळींचा संख्या दोन लाख २२ हजार ४०८ इतकी झाली आहे. तर देशात सध्या ३४ लाख ४७ हजार १३३ रुग्ण उपचाराधीन आहेत. करोना मृत्यूंच्या यादीत जगात भारत तिसऱ्या क्रमांकावर पोहोचला आहे. या यादीत अमेरिका (५,९१,०६२) पहिल्या क्रमांकावर आहे, तर ब्राझील (४,०७,७७५) दुसऱ्या क्रमांकावर आहे.

३ मे रोजीच्या आकडेवारीनुसार २४ तासांत देशात करोनामुळे ३,४१७ जणांचा मृत्यू झाला होता. त्यामुळे मृतांची एकूण संख्या दोन लाख १८ हजार ९५९ वर पोहोचली होती. त्यात आता आणखी तीन हजार ४४९ रुग्णांची भर पडली आहे. करोनातून आतापर्यंत एक कोटी ६२ लाख ९३ हजार ००३ जण बरे झाले असून, मृत्युदर १.१० टक्के इतका आहे. देशातील एकूण मृत्यूपैकी ७० हजार २८४ मृत्यू महाराष्ट्रातील आहेत.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on May 4, 2021 10:00 am

Web Title: coronavirus udpates covid crisis in india 3 449 deaths in past 24 hours death cases increase bmh 90
टॅग : Coronavirus
Next Stories
1 करोना पॉझिटिव्ह पत्नी, मुलीची देखभाल करण्यासाठी सुट्टी मिळत नसल्याने UP मधील पोलीस अधिकाऱ्याचा राजीनामा
2 “हा देश नेमकं कोण चालवतंय माहिती नाही,” ऑक्सिजनअभावी होणाऱ्या मृत्यूंवरुन डॉक्टरांचा संताप
3 “तुमच्याकडे चारच दिवस बाकीयत, काय करायचंय ते करुन घ्या”; योगी अदित्यनाथांना जीवे मारण्याची धमकी
Just Now!
X