‘अग्निवीरां’ना ‘बीएसएफ’मध्ये १० टक्के आरक्षण; कमाल वयोमर्यादेची अटही शिथील 

महत्त्वाकांक्षी अग्निपथ योजनेला प्रोत्साहन देण्यासाठी, केंद्रीय गृह मंत्रालयाने माजी अग्निवीरांसाठी सीमा सुरक्षा दलातील (बीएसएफ) रिक्त पदांच्या भरतीसाठी कमाल वयोमर्यादेची अट शिथील करण्यासह दहा टक्के आरक्षण जाहीर केले आहे. सीमा सुरक्षा दलाच्या, ‘जनरल डय़ुटी केडर’ (अराजपत्रित) भरती नियम,२०१५ मध्ये सुधारणा केल्यानंतर अधिसूचनेद्वारे ही घोषणा करण्यात आली. 

या संदर्भातील अधिसूचनेत नमूद केले, की दहा टक्के रिक्त पदे माजी अग्निवीरांसाठी राखीव असतील. मंत्रालयाने म्हटले आहे की माजी अग्निवीरांच्या पहिल्या तुकडीच्या उमेदवारांसाठी कमाल वयोमर्यादा पाच वर्षांपर्यंत शिथील असेल, इतर तुकडीच्या उमेदवारांसाठी ही मर्यादा तीन वर्षांपर्यंत शिथील असेल. माजी अग्निवीरांनाही शारीरिक कार्यक्षमता चाचणीतून सूट दिली जाईल.

केंद्राने गेल्या वर्षी १४ जून रोजी लष्कर, नौदल आणि हवाई दलात साडे सतरा ते २१ वयोगटातील तरुणांच्या भरतीसाठी अग्निपथ योजना सुरू केली होती. त्याचा चार वर्षांचा अल्प मुदतीचा सेवाकाळ आहे. या योजनेंतर्गत भरती झालेल्यांना ‘अग्निवीर’ म्हणून ओळखले जाते. चार वर्षांचा कार्यकाळ पूर्ण झाल्यानंतर प्रत्येक तुकडीतील २५ टक्के अग्निवीरांना नियमित सेवेत सामावून घेण्याचीही तरतूद आहे. उर्वरित ७५ टक्के अग्निवीरांसाठी केंद्रीय निमलष्करी दल व ‘आसाम रायफल्स’मधील दहा टक्के राखीव ठेवल्या जातील. अग्निपथ योजनेंतर्गत पहिल्या तुकडीत भरती झालेल्या कमाल २१ वर्षे वयोमर्यादेतील उमेदवारास लष्कर, हवाई दल किंवा नौदलात चार वर्षांच्या सेवेनंतर ‘बीएसएफ’मध्ये भरती होण्यासाठी ३० वर्षे वयोमर्यादेपर्यंत संधी मिळेल. त्यानंतरच्या तुकडय़ांसाठी वयाच्या २८ वर्षांपर्यंत भरतीची वयोमर्यादा शिथील केली आहे.

निर्णयामागील हेतू

अग्निवीरांना निमलष्करी दलात सामावून घेण्याचा गृह मंत्रालयाचा निर्णय महत्त्वपूर्ण आहे. कारण यामुळे माजी अग्निवीरांना निवृत्तीच्या वयापर्यंत रोजगाराची संधी मिळेल. तसेच निमलष्करी दलांनाही त्याचा फायदा होईल. कारण त्यांच्याकडील ७० हजारांपेक्षा जास्त रिक्त जागा भरण्यासाठी त्यांना कुशल प्रशिक्षित कर्मचारीवर्ग मिळणार आहे.