राजधानी दिल्लीत अल्पवयीन मुलीवर सामूहिक बलात्कार, मित्रासह पार्कमधून घरी परतत असताना घडली घटना

नेमकी काय घडली घटना?

पोलीस सूत्रांनी दिलेल्या माहितीनुसार दिल्लीतल्या शाहबाद डेअरी भागात असलेल्या पार्कमध्ये २७ जूनच्या रात्री ही अल्पवयीन मुलगी तिच्या मित्रासह गेली होती. मित्राला भेटून आल्यानंतर हे दोघंही घरी परतत होते. त्यावेळी हे चौघेजण तिकडे आले आणि त्यांनी तिच्याशी अश्लील वर्तन केलं. तसंच तिच्यावर सामूहिक बलात्कार केला आणि तिथून पळ काढला. या घटनेनंतर पीडिता तिच्या घरी गेली. तिने कुटुंबीयांना या प्रकरणाची माहिती दिली. कुटुंबीय मुलीला घेऊन पोलीस ठाण्यात पोहचले. मुलीचा जबाब नोंदवून तक्रार नोंदवण्यात आली आहे. यानंतर घटनास्थळी पोलीस पोहचले त्यांनी तिथल्या लोकांची चौकशी केली.

मुलीच्या मित्राने काढला पळ

पोलिसांनी दिलेल्या माहितीनुसार ही मुलगी तिच्या मित्राला भेटण्यासाठी दीड वाजता पार्कमध्ये गेली होती. ती परतत असताना तीन-चार जण तिकडे आले. त्यांनी या दोघांनाही धमकवण्यास सुरुवात केली. या घटनेच्या वेळी मुलीचा मित्र तिथून पळून गेला. त्यानंतर या तीन ते चार जणांनी मुलीवर बलात्कार केला. या घटनेनंतर पोलिसांनी कलम ३७६ ड (सामूहिक बलात्कार), कलम ३२३, कलम ३४ यानुसार गुन्हा दाखल केला आहे. तसंच पीडितेचं वय १६ असल्याने सेक्शन ६ च्या अन्वये POCSO च्या अंतर्गतही गुन्हा दाखल केला आहे. शाहबाद डेअरी पोलीस ठाण्यात हा गुन्हा दाखल करण्यात आला आहे.

पोलीस उपायुक्त (Outer North ) रवि सिंग यांनी माहिती दिली आहे की ही घटना घडल्यानंतर आम्ही १९ वर्षांच्या बॉबीला अटक केली. त्याने त्याच्यासह जे इतर तिघे होते त्यांचीही माहिती दिली. आरोपींपैकी एक मुलगा अल्पवयीन आहे. त्यानंतर आम्ही इतर तिघांनाही अटक केली. हे सगळे शाहबाद डेअरी भागात राहणारे आहेत. सगळेच जण ड्रग्ज अॅडिक्ट आहेत अशीही माहिती पोलिसांनी दिली. टाइम्स ऑफ इंडियाने याविषयीचं वृत्त दिलं आहे.