Surendra Kewat Case : उद्योगपती खेमकांच्या हत्येनंतर आता भाजपा नेत्याची गोळ्या घालून हत्या; बिहारमध्ये एकच खळबळ

सुरेंद्र केवट यांची बिहटा-सरमेरा या महामार्गालगत शेती आहे. त्या शेतीजवळच दुचाकीस्वारांनी गोळ्या घालून त्यांची हत्या केली. त्यानंतर केवट यांच्या कुटुंबियांनी त्यांना तातडीने हॉस्पिटलमध्ये उपचारासाठी दाखल केलं. मात्र, उपचारादरम्यान त्यांचा मृत्यू झाला. या संदर्भातील वृत्त हिंदुस्तान टाईम्सने दिलं आहे.

वृत्तानुसार, केवट हे पाण्याचा पंप बंद करण्यासाठी बिहटा-सरमेरा राज्य महामार्गालगत असलेल्या त्यांच्या शेतावर गेले होते. मात्र, शेतावरून पुन्हा परतत असताना दुचाकीवरून आलेल्या दोन जणांनी केवट यांच्यावर गोळीबार केला. त्यानंतर हल्लेखोर घटनास्थळावरून फरार झाले. या गोळीबारात केवट हे गंभीर जखमी झाले. त्यानंतर त्यांना हॉस्पिटलमध्ये दाखल करण्यात आलं. पण उपचारादरम्यान त्यांचा मृत्यू झाला.

या घटनेचा पोलिसांनी तपास सुरू केला आहे. केवट यांचा मृतदेह शवविच्छेदन तपासणीसाठी पाठवण्यात आला आहे. पोलीस घटनास्थळाच्या आजूबाजूच्या परिसरातील सीसीटीव्ही फुटेज तपासत आहेत. वृत्तानुसार, सुरेंद्र केवट हे स्थानिक पातळीवर पशुवैद्य आणि शेतकरी म्हणून ओळखले जात होते. ते शेखपुरा गावात त्यांच्या कुटुंबासह राहत होते. तसेच ते भाजपाचे पदाधिकारी होते.

तेजस्वी यादव यांची बिहार सरकारवर टीका

बिहारचे माजी उपमुख्यमंत्री तेजस्वी यादव यांनी रविवारी मुख्यमंत्री नितीश कुमार आणि त्यांच्या मंत्रिमंडळावर पाटण्यातील बिघडलेल्या कायदा आणि सुव्यवस्थेवर प्रश्नचिन्ह उपस्थित केले. ते म्हणाले की, पाटणामध्ये एका भाजपाच्या पदाधिकाऱ्याची गोळ्या घालून हत्या झाली. काय बोलावे आणि कोणाला? एनडीए सरकारमधील कोणी सत्य ऐकण्यास किंवा त्यांच्या चुका मान्य करण्यास तयार आहे का? मुख्यमंत्र्यांच्या प्रकृतीबद्दल सर्वांना माहिती आहे, पण भाजपाचे दोन निरुपयोगी उपमुख्यमंत्री काय करत आहेत?”, अशा शब्दांत तेजस्वी यादव यांनी टीका केली आहे.

काही दिवसांपूर्वी उद्योगपती गोपाल खेमकांची हत्या

बिहारच्या पाटणामध्ये ४ जुलै रोजी रात्री प्रसिद्ध व्यावसायिक गोपाल खेमका यांची गोळ्या घालून हत्या करण्यात आल्याची घटना घडली होती. दोन बाइकस्वारांनी गोपाळ खेमका यांना समोरून डोक्यात गोळ्या घालत त्यांची हत्या केली. ही घटना ज्या ठिकाणी घडली, त्या ठिकाणाहून पोलीस ठाणे अवघ्या ५०० मीटर अंतरावर आहे. पण असं असतानाही अशा प्रकारची घटना घडल्यामुळे पोलीस प्रशासनावर अनेकांनी संताप व्यक्त केला आहे. गोपाल खेमका यांची त्यांच्या निवासस्थानाबाहेर गोळ्या झाडून हत्या करण्यात आल्याचा तो थरारक क्षण सीसीटीव्ही कॅमेऱ्यात कैद झाला आहे. या घटनेचा पोलीस तपास करत आहेत.