बाबा सिद्दीकी हत्या प्रकरणातील मुख्य सूत्रधार अनमोल बिश्नोईला काही तासांतच भारतात आणणार; अमेरिकेकडून प्रत्यार्पणाची प्रक्रिया पूर्ण

एका वरिष्ठ अधिकाऱ्याने द इंडियन एक्सप्रेसला सांगितले की, अनमोलला अमेरिकेतून भारताकडे प्रत्यार्पण करण्याची प्रक्रिया पूर्ण झाली आहे. अनमोलवर देशभरात अनेक गुन्हे दाखल आहेत आणि त्याला कोणाच्या ताब्यात द्यायचे याचा निर्णय केंद्र सरकार घेणार आहे. आणखी एका अधिकाऱ्याने सांगितले की, संबंधित अधिकारी अनमोलला घेऊन काही तासांत दिल्लीत पोहोचतील.

बाबा सिद्दीकी यांचा मुलगा, माजी आमदार झीशान सिद्दीकी यांनीही द इंडियन एक्सप्रेसला सांगितले की, त्यांना आज अमेरिकन अधिकाऱ्यांकडून एक ईमेल आला होता. त्यामध्ये त्यांना सांगण्यात आले होते की, अनमोल बिश्नोईला अमेरिकन सरकारने अमेरिकेतून हद्दपार केले आहे. अनमोल हा सध्या तुरुंगात असलेला गँगस्टर लॉरेन्स बिश्नोईचा भाऊ आहे.

झीशान सिद्दीकी म्हणाले की, “मी पीडितेच्या कुटुंबातील असल्याने, माझा ईमेल अमेरिकन अधिकाऱ्यांकडे नोंदणीकृत आहे आणि ते मला या प्रकरणातील घडामोडींबद्दल माहिती देतात. आज सकाळी, मला एक ईमेल मिळाला ज्यामध्ये बिश्नोईला अमेरिकेतून हद्दपार करण्यात आल्याचे म्हटले आहे.”

बाबा सिद्दीकी हत्या प्रकरणात अनमोल आरोपी

बाब सिद्दीकी यांची १२ ऑक्टोबर २०२४ रोजी वांद्रे येथील त्यांच्या कार्यालयाबाहेर गोळ्या झाडून हत्या करण्यात आली होती. या प्रकरणात अनमोल बिश्नोई वॉन्टेड आरोपी होता. मुंबई पोलिसांच्या गुन्हे शाखेने या प्रकरणाचा तपास करत २६ जणांना अटक केली आहे. आरोपपत्रात, गुन्हे शाखेने अनमोल बाब सिद्दीकी यांच्या हत्येचा सूत्रधार असल्याचे म्हटले आहे.

पोलिसांनी दिलेल्या माहितीनुसार, अटक केलेल्या आरोपींच्या मोबाईल फोनमध्ये त्यांना अशा अनेक व्हॉइस क्लिप्स सापडल्या आहेत ज्या अनमोलशी संबंधित आहेत. कथित ऑडिओ क्लिपमध्ये, अनमोल लोकांना सूचना देताना आणि हत्या करण्यासाठी प्रवृत्त करत असल्याचे ऐकू येते.

सिद्धू मूसेवाला प्रकरण आणि गेल्या वर्षी सलमान खानच्या घराबाहेर झालेल्या गोळीबारातही पोलिसांना हवा असलेल्या २६ वर्षीय अनमोल बिश्नोईला गेल्या वर्षी नोव्हेंबरमध्ये अमेरिकन अधिकाऱ्यांनी ताब्यात घेतले होते. तेव्हापासून त्याला भारतात परत आणण्याची प्रक्रिया सुरू होती.