बेभरवशाच्या श्रीलंकेविरुद्ध बांगलादेशला विजयाची आशा

बांगलादेशने त्यांच्या विश्वचषक अभियानाचा प्रारंभ अत्यंत दिमाखात करीत दक्षिण आफ्रिकेला २१ धावांनी पराभूत केले होते. मात्र, त्यानंतर न्यूझीलंडकडून दोन गडी राखून पराभव झाल्याने तर इंग्लंडकडून १०६ धावांनी पराभव स्वीकारावा लागल्याने त्यांची गाडी अडखळली. बांगलादेशचा यष्टीरक्षक मुशफिकर रहीम आणि अष्टपैलू शाकिब अल हसन यांनी फलंदाजीत दमदार कामगिरी केली आहे. विशेषत्वे शाकिबने दोन अर्धशतके आणि एक शतक अशी कामगिरी करीत संघासाठी योगदान दिले आहे. मात्र सौम्य सरकार आणि तमिम इक्बाल या सलामीवीरांना पुरेसे यश मिळालेले नाही. मात्र त्यांची सगळ्यात मोठी डोकेदुखी ही त्यांची गोलंदाजी असून त्यात सुधारणेची गरज आहे.

दुसरीकडे श्रीलंकेला न्यूझीलंडविरुद्धच्या मोठय़ा पराभवातून सावरत दमदार कामगिरी करावी लागणार आहे. त्यानंतर त्यांनी अफगणिस्तानला नमवले असले तरी पाकिस्तानविरुद्धच्या सामन्यात पावसाचा अडथळा आल्याने दोन्ही संघांना गुण विभागून देण्यात आले आहेत. त्यामुळे बांगलादेशविरुद्धचा सामना हा श्रीलंकेच्या दृष्टीने पुन्हा सावरण्याची संधी आहे. श्रीलंकेची फलंदाजी दोन्ही सामन्यांमध्ये संपूर्ण ५० षटके खेळण्यात अपयशी ठरली होती. न्यूझीलंडविरुद्ध अवघ्या १४ धावांमध्ये पाच फलंदाज गमावत तर अफगणिस्तानविरुद्ध ३६ धावांमध्ये ७ जण बाद होताना श्रीलंकेच्या फलंदाजांनी त्यांचा बेभरवसा दाखवून दिला होता. तसेच अफगाणिस्तानविरुद्धच्या सामन्यात विजयवीर ठरलेला गोलंदाज नुवान प्रदीप याच्या अनुपस्थितीत श्रीलंकेला गोलंदाजीची धुरा सांभाळावी लागणार आहे. त्याच्या अनुपस्थितीत श्रीलंकेची सर्व आशा प्रामुख्याने लसिथ मलिंगावर अवलंबून राहणार आहेत. त्यामुळे आता या सामन्यात जिंकायचे असल्यास श्रीलंकेला सर्व आघाडय़ांवर सातत्यपूर्ण कामगिरी करावी लागेल.

१० आंतरराष्ट्रीय क्रिकेटच्या तिन्ही प्रकारांत मिळून १२,००० धावा पूर्ण करण्यासाठी अँजेलो मॅथ्यूजला (११,९९०) फक्त १० धावांची आवश्यकता आहे. अशी कामगिरी करणारा तो श्रीलंकेचा आठवा फलंदाज ठरू शकतो. आतापर्यंतच्या दोन्ही सामन्यांत मॅथ्यूज शून्यावरच बाद झाला आहे.

आमच्या गोलंदाजांनी दक्षिण आफ्रिका आणि न्यूझीलंडविरुद्ध चांगली गोलांदाजी केली. मात्र इंग्लंडविरुद्ध आमची गोलंदाजी पूर्णपणे ढेपाळल्याने त्यांना आमच्याविरुद्ध तब्बल ३८६ धावा उभारता आल्या. त्यामुळे या सामन्यात आम्हाला अधिक चांगली गोलंदाजी करण्याकडे विशेष लक्ष द्यावे लागणार आहे.

– शाकिब अल हसन, बांगलादेशचा अष्टपैलू

सामना क्र.१६

श्रीलंका वि. बांगलादेश

स्थळ : काऊंटी मैदान, ब्रिस्टल  ’सामन्याची वेळ : दुपारी ३ वा.

थेट प्रक्षेपण : स्टार स्पोर्ट्स १, स्टार स्पोर्ट्स २,

स्टार स्पोर्ट्स सिलेक्ट १, स्टार स्पोर्ट्स हिंदी १.

संघ

श्रीलंका : दिमुथ करुणारत्ने (कर्णधार) लसिथ मलिंगा, अविष्का फर्नाडो, लाहिरु थिरिमाने,कुशल परेरा (यष्टीरक्षक), कुशल मेंडिस, अ‍ॅँजेलो मॅथ्यूज, धनंजया डी’ सिल्व्हा, जेफ्री वॅँडरसे, थिसारा परेरा, इसुरू उडाना, सुरंगा लकमल, नुवान प्रदीप, जीवन मेंडिस, मिलिंदा सिरिवर्दना.

बांगलादेश : मश्रफी मोर्तझा (कर्णधार ), तमिम इक्वाल, सौम्य सरकार, लिटन दास, मुशफिकर रहीम (यष्टीरक्षक), रियाज महम्मदुल्ला, शाकिब अल हसन, महम्मद मिथुन, शब्बीर रहमान, मुसद्दीक हुसेन, मोहम्मद सैफुद्दीन, मेहदी हसन, रुबेल हसन, मुस्तफीझूर रेहमान, अबू झायेद.

आमनेसामने

एकदिवसीय   

सामने : ४५, श्रीलंका: ३६,

बांगलादेश : ७, टाय / रद्द : २

विश्वचषकात    

सामने : ३, श्रीलंका : ३,

बांगलादेश : ०, टाय / रद्द : ०